मन्त्रालयमाथि प्रधानमन्त्रीको अनुगमन सुरु, यस्तो छ ओलीको गोजीमा रेडजोनमा परेका मन्त्रीका नाम
प्रधानमन्त्री तथा मन्त्रिपरिषद्को कार्यालयले मन्त्रालयहरूले आफ्नो कार्ययोजनाअनुसार कति काम गरे भन्नेबारे अनुगमन सुरु गरेको छ ।
प्रधानमन्त्री कार्यालयको अनुगमन महाशाखाले मंगलबार अनुगमनका लागि तयार गरिएको सफ्टवेयरमा मन्त्रालयहरूले प्रगति विवरण किन पेस गरेनन् भन्ने शीर्षकमा अनुगमन गरेको हो ।
अनलाइन मनिटरिङका लागि प्रधानमन्त्रीको कार्यालयले सफ्टवेयर बनाएर त्यसमा मन्त्रालयले कार्ययोजनाअनुसार गरेका कामको विवरण अपडेट गर्न भनेको थियो ।
तर, केही मन्त्रालयलाई सफ्टवेयरमा कसरी प्रगति विवरण अपडेट गर्ने भन्ने अन्योल देखिएकाले सहजीकरणका लागि गएको प्रधानमन्त्री कार्यालयस्थित अनुगमन महाशाखाका सहसचिव यमलाल भुसालले बताए ।
उनले सरकारको नीति र बजेटका आधारमा मन्त्रालयले पेस गरेको कार्ययोजनाअनुसार कति काम भइरहेको छ भन्ने विषय अब अनलाइनबाटै अनुगमन हुने बताए ।
त्यसक्रममा विवरण अनलाइनमा अपडेट गर्न केही मन्त्रालयलाई अन्योल देखिएपछि मन्त्रालयमै गएर सिकाइएको उनले बताए । अनलाइन अनुगमन प्रणाली भर्खर सुरु भएकाले सबै मन्त्रालयलाई सक्रिय बनाउन केही समय लाग्ने सहसचिव भुसालको भनाइ छ ।
करिब एक सातापछि अनलाइनबाट मन्त्रालयको अनुगमन गर्ने प्रणाली सक्रिय हुने उनले बताए ।
सफ्टवेयर कस्तो छ ?
गत २७ असारमा प्रधानमन्त्री केपी ओलीले हरेक मन्त्रालयसँग सरकारको नीति तथा योजना र बजेटअनुसार आर्थिक वर्षका लागि मन्त्रालयको कार्ययोजना माग गरेका थिए ।
त्यसै आधारमा मन्त्रालयले समय तोकेर पेस गरेको कार्ययोजनाअनुसार काम गरिरहेको छ कि छैन भन्ने अध्ययन गर्न प्रधानमन्त्रीको कार्यालयले अनुगमन महाशाखा बनाएको छ ।
महाशाखाले अनलाइन प्रणालीबाटै अनुगमन गर्ने सफ्टवेयर निर्माण गरेको छ । उक्त सफ्टवेयरमा हरेक मन्त्रालयले आफ्नो कार्ययोजनाअनुसार भएको कामको विवरण पेस गर्नुपर्नेछ ।
केपी शर्मा आेली नेतृत्वको सरकारको चाैतर्फी आलोचना बढ्दै गएको छ । सरकारले देशमा विभिन्न किसिमका घटनालाई निरुत्साहित गर्नुको साटो मन्त्रीहरु अयोग्य रहेको भन्दै आेलीले मन्त्रीहरुको लिस्ट तयार पारेका छन् ।
आेलीले असक्षम मन्त्रीहरुको सुचि तयार पारिरहेको स्रोतले जनाएको छ । केहि दिन देखि आेलीले मन्त्रीहरु हटाउन लागेको भन्दै व्यापक चर्चा चलेको थियो । तर, यो हल्ला निराधार भएको भन्दे गृहमन्त्री बादल र प्रधानमन्त्री आेली आफैले स्पष्टिकरण समेत दिएका थिए ।
स्रोतका अनुसार प्रधानमन्त्रीले हटाउन तयार पारेको मन्त्रीको नाम एउटा डायरीमा सुरक्षित राखेको जनाइएकोछ ।
असक्षम मन्त्रीहरुको ‘हिट लिष्ट’ मा पर्यटनमन्त्री रवीन्द्र अधिकारी, भौतिक पूर्वाधारमन्त्री रघुवीर महासेठ, उद्योगमन्त्री मातृका यादव, गृहमन्त्री रामबहादुर थापा ‘बादल’, संघीय मामिलामन्त्री लालबाबु पण्डित र अर्थमन्त्री डा. युवराज खतिवडाको नाम छ ।
संयुक्त राष्ट्रसंघको महासभामा भाग लिन अमेरिका उड्नुअघि प्रधानमन्त्री ओलीले हटाउने तयारी गरेर ‘हिट लिष्ट’ बनाएका मन्त्रीहरुसँग एक्लाएक्लै भेटवार्ता गरेर समिक्षा गर्ने स्रोतको दाबी छ ।
नेकपा निकट उच्च स्रोतले भन्यो,‘अमेरिका जानुअघि प्रधानमन्त्रीज्यूले असन्तुष्ट रहेका सबै मन्त्रीहरुसँग छलफल गर्नुहुन्छ, सायद मन्त्रीहरु हटाउन पनि सक्नुहुन्छ ।’
यता, नेकपाभित्र अध्यक्षद्धय ओली र पुष्पकमल दाहाल प्रचण्डबीच नै सहमति बनेर मन्त्रीहरु हेरफेर गर्न लागिएको बुझिएको छ ।
अहिले नयाँ मन्त्रीहरु क–कसलाई पठाउने भन्नेबारेपनि दुई अध्यक्षबीच छलफल प्रारम्भिक रुपमा चल्न थालेको छ । तर, नेकपामा यसरी मनोमानी ढंगबाट मन्त्रीहरु हटाउन थाले पार्टी फुट्ने भन्दै नेता माधव नेपालले धम्की समेत दिएको बुझिएको छ ।