फेरि ह्वातै बढ्यो सुनको भाउ

 

नेपाली चाड दशैं नजिकिंदै छ । दशैंमा सुनको गहना लगाउने धेरैको धोको हुन सक्छ । तर, सुनको बढ्दो भाउका कारण धेरैलाई सकस सिर्जना गरेको छ ।

हिजो सामान्य तल झरेको सुनको बजार भाउ आज (सोमबार) फेरि उक्लिएको छ । आज सुनको मूल्य तोलामा ४ सय रुपैंयाले बढेको छ । नेपाल सुनचाँदी व्यवसायी महासंघका अनुसार आजछापावाला सुन प्रतितोला ५८ हजार रुपैयाँमा किनबेच भइरहेको छ ।

तेजावी सुन प्रतितोला ५७ हजार ७ सय रुपैयाँमा कारोबार भइरहेको छ । त्यस्तै चाँदीको मूल्य पनि तोलामा पाँच रुपैयाँले वृद्धि भई ७१५ रुपैंयामा किनबेच भइरहेको महासंघले जनाएको छ । बजारमा माग अनुसारको सुन आपूर्ति नहुँदा सुनको भाउ बढेको जानकार बताउँछन् ।

नेपालमा दैनिक ३५–देखि ४० किलोसम्म सुन खपतको अवस्था भए पनि अहिले माग अनुसार सुन आपूर्ति नहुँदा बजारमा सुनको अभाव छ । सुनचाँदी व्यवसायीहरुले सुनको कोटा बढाउन सरकारसँग माग गर्दै आएका छन् । सरकारले सुन तस्करीमा कढाइ गरेका कारण पनि अवैध रुपमा भित्रिने सुन नेपाल भित्रिन सकेको छैन ।

अवैध रुपमा भित्रिने सुनले समेत बजारको मागलाई पूर्ति गर्ने गरेको परिपेक्ष्यमा त्यो बाटो बन्द भएपछि बजारमा सुन अभाव देखिएको जानकार बताउँछन् । अहिले सुन अभाव भएपछि कतिपय सुन चाँदी व्यवसायीको कारोबार नै बन्द जस्तै बनेको छ ।