कर्मचारीहरुलाई खुशीको खबर, १० लाखसम्म उपचार खर्च पाउने, ६ लाखको स्वास्थ्य विमा
के तपाई कर्मचारी हुनुहुन्छ ? यदि हो भने तपाईको लागि खुशीको खबर । कर्मचारी सञ्चय कोषले आउँदो कात्तिकदेखि ६ लाख सञ्चयकर्ताको १० लाख रुपैयाँसम्मको स्वास्थ्य बिमा गरिदिने भएको छ ।
कोषले आफनो आम्दानीबाट सञ्चयकर्ताको स्वास्थ्य बिमा गर्न लागेको जनाएको छ । स्वास्थ्य बिमा योजना कात्तिकदेखि कार्यान्वयनमा आउने कोषका प्रशासक तुल्सी गौतमले जानकारी दिएका छन् । कोषको आउँदो आइतबार हुने ५७ औं वार्षिकोत्सवमा सञ्चयकर्ताको स्वास्थ्य बीमा योजना घोषणा गर्ने कार्यक्रम छ ।
कोषले प्रतिसञ्चयकर्ता ४५० रुपैयाँ बिमा शुल्क तिर्ने सहमति राष्ट्रिय बीमा कम्पनीसँग गरेको छ । यसबाट ६ लाख सञ्चयकर्तालाई २७ करोड रुपैयाँ खर्च गर्नुपर्ने हुन्छ । राष्ट्रिय बिमाले बिमा शुल्क यो भन्दा कम गर्न सहमति जनाएको छ ।
बिमा शुल्कको दायित्व सञ्चयकर्तालाई नपर्ने गरी स्वास्थ्य बिमा हुने गौतमले बताएका छन् ।
सञ्चयकर्ताको मृत्युपछि सामाजिक सुरक्षा कार्यक्रम कार्यान्वयनमा रहेकोमा अब वहाल रहेको अवस्थामा सञ्चयकर्तालाई ठूलो रोग लागेमा १० लाख रुपैयाँसम्म उपचार खर्च र १ लाख रुपैयाँ औषधि उपचार खर्च उपलब्ध हुनेछ ।
यो वर्ष संचयकर्तालाई बाँडेर बचत हुने नाफा रकमबाट बीमा गर्ने र अर्को वर्षदेखि विशेष व्यवस्था गर्ने तयारी कोषको छ ।
‘हामीसंग अहिले १ अर्ब ६० करोड रुपैयाँको सामाजिक सुरक्षा कोष छ । त्यो कोषले वार्षिक १५ करोड रुपैयाँ आम्दानी गर्छ’ उनले भने, ‘वार्षिक १० देखि १२ करोड रुपैयाँ व्यवस्थापन गर्न समस्या छैन ।’ कोषले अहिले पनि सञ्चयकर्तालाई औषधि उपचार खर्च दिंदै आएको छ ।
अब बिमाबाट ब्यहोर्ने किसिमले आउन लागेको हो । दुर्घटना क्षतिपूर्ति, औषधि उपचार र प्रसुति उपचारका लागि कोषले पैसा दिंदै आएको छ । यता सरकारले पनि २ लाख रूपैयाँसम्मको बिमा गरेको छ ।
