लमजुङमा बाढीपहिरो– ४ जनाको मृत्यु, ३ जना बेपत्ता : उद्धारमा गएको हेलिकप्टर ल्यान्ड हुन सकेन
बुधबारदेखि परेको अविरल वर्षापछि आएको बाढी र पहिरोमा परि लमजुङमा चार जनाको मृत्यु भएको छ भने ३ जना बेपत्ता भएका छन् ।
मृत्यु हुनेमा मर्स्याङदी गाउपालिका वडा नम्बर तीनकी ६० वर्षीया अतिरुपा थापा, उनकी १० वर्षीया नातिनी शिरिषा, मर्स्याङ्दी गाउपालिका वडा नम्बर ४ का विष्णुकलि गुरुङ रहेका छन् । अर्का एक जना मृतकको भने नाम खुल्न सकेको छैन ।
बाढीमा परि चार जना बेपत्ता भएका छन् ।
दोर्दी खोला हाइड्रोपावरमा काम गर्ने कामदारलाई खोलाले बगाएको स्थानीयले बताएका छन् । वेपत्ता भएकामा २८ वर्षीय वलिराम चौधरी, २२ लक्ष्मी प्रसाद थारु, ललितमाया गुरुङ रहेका छन् । यस्तै अर्का एकजना पनि पहिरोसँगै बगेका छन् ।
बाढीले एउटा ट्याक्टर, ३ वटा मोटरसाइकल, २ वटा जीप बगाएको छ।
लमजुङको मर्स्याङदी गाउँपालिका वडा ३,४ ५ र ६ का क्षेत्रमा मर्स्याङदी, खुदी ङ्यादीलगायतका खोलामा बाढी आएको लमजुङ पुनर्निर्माणका अधिकृत शिव रेग्मीले बताए ।
लम्जुङको उत्तरी क्षेत्रमा वर्षासँगै आएको पहिरोमा केही सर्वसाधारणसमेत फसेका छन् ।
‘ताघ्ग्रिङको विभिन्न स्थानमा पहिरोले बाटो अवरुद्ध हुँदा अन्नपूर्ण पद मार्ग र मनाङ जाने सर्वसाधारण फसेका छन्’ रेग्मीले भने,‘उनीहरुको उद्धारका लागि जिल्लाबाट हेलिकप्टर गएका छन् ।’
पहिरोमा फसेका सर्वसाधारण र पर्यटकको उद्धारका लागि वेशिसहरबाट गएको हेलिकप्टर अवतरण गर्ने स्थान अभाव भएपछि फर्किएको छ ।
पर्यटकको उद्धारका लागि एउटा हेलिकप्टर र सर्वसाधारणको उद्धारको लागि नेपाली सेनाको हेलिकप्टर खटिएको छ ।
लम्जुङका सांसद देव गुरुङ, पूर्व सांसद जमिन्द्रमान घलेसहितको टोली प्रभावित क्षेत्रको अनुगमन गरि सदरमुकाम फर्किएको छ ।
