पोखरामा सेती नदी थुनियो, नदी थुनिएर ताल
पोखरामा सोमबारदेखिको वर्षाका कारण सेती नदी थुनिएर ताल बनेको छ । लगातारको वर्षाका कारण मुख्य तथा खहरे खोलाहरुमा पानीको बहाव बढेसँगै सेती नदी थुनिएर ताल बनेको हो ।
पोखराको रामघाटमा पानी जमेर ताल बनेको छ । पानीको निकास निकै कम मात्रामा भएपछि त्यसलाई खुलाउने प्रयास भइरहेको प्रहरीले जनाएको छ । ठूलो पानी पर्दा प्रत्येक वर्ष सेती नदी थुनिने समस्या हुने गरेको छ । ठूलो पानी परेपछि त्यसको भार रामघाटमा बढी पर्छ र पानीको निकास सहज नहुँदा ताल बन्ने गरेको छ ।
एकैचोटि खुल्दा वरिपरिको बस्तीमा असर पर्न सक्ने भन्दै प्रहरीले नदी किनार आसपासमा रहेको बस्ती र मानिसहरुलाई सचेत रहन आग्रह गरेको छ । पानिको निकास विस्तारै विस्तारै भइरहेको डिएसपी रविन्द्र गुरुङले जानकारी दिए ।
