ठमेलको ज्याठामा आगलागी, करिब १० करोड क्षति भएको अनुमान
काठमाडौंको व्यस्त मानिने पर्यटकीय क्षेत्र ठमेलको ज्याठामा मंगलबार बिहान आगलागी भएको हो ।
स्थानीयबासी सुनीलमान स्थापितको घरबाट बिहान ४:२५ बाट आगो लाग्न शुरु भएको हो । आगो स्थापितको घरबाट अर्को छिमेकीको घरसम्म फैलिएको हो ।
प्रहरीका अनुसार अक्सिजन ग्यास सिलिन्डर भण्डारण गरिएको भुँइतलासम्म सल्किएपछि अनियन्त्रित भएको र ग्यास सिलिन्डर पड्किन थालेको हो । आगो निकै ठूलो गरी दन्किएपछि नियन्त्रणका लागि पुगेका प्रहरी र अग्नी नियन्त्रकलाई अप्ठ्यारो भएको थियो ।
आगो निभाउन पुगेका प्रहरीका अनुसार आगो नियन्त्रणको प्रयास समयमै सफल हुन नसक्दा सँगै जोडिएका गौतम तुलाधर र अजयरत्न स्थापितको घरमा पनि आगोले क्षति पुगेको छ । आगलागीबाट १० करोड बराबरको धनमाल क्षति अनुमान गरिएको छ ।
