ठगी गर्ने ट्याक्सीलाई यसरी कारवाही गर्दै छ सरकारले
ट्याक्सीमा कम्प्युटराइज्ड बिलिङ मेसिन जोडिए पनि त्यसको प्रयोग नगन्य मात्रै भइरहेका पाइएको छ । ठगी नियन्त्रणका लागि सुरु गरिएको मिटर प्रिन्टर सिस्टम प्रयोग गर्न ट्याक्सीहरु अझै तयार भएका छैनन् ।
महानगरीय ट्राफिक प्रहरी महाशाखाका प्रवक्ता एसपी राजुकमार लम्साल अहिले दैनिक ३० भन्दा बढी ठगी गर्ने ट्याक्सीलाई कारवाही गरिँदै आएको बताउँछन् ।
मिटर नचलाएर कति दिनुहन्छ ? भनेर सोध्ने ट्याक्सीवालाको प्रवृत्तिमा कमी आउन सकेको छैन । त्यसैले हामीले सिभिलमा प्रहरीहरु खटाएर छड्के गर्दै ट्याक्सीमाथि कारवाही गरिरहेका छौं,’ उनले भने,’मिटरमा जान नमान्नेमाथि अभियानकै रुपमा कारवाही गरिरहेका छौं ।’
कारवाहीको डरले ट्याक्सीमा जोडिएका मिटर र मिटर बिलिङ सिस्टम प्रयोगमा ल्याउन ट्याक्सी चालक र व्यवसायीले अटेरी गरिरहेका छन् । कतिपय ट्याक्सीले त अझै बिलिङ सिस्टम जोडेका छैनन् ।
धेरैले जोडिएको मेसिनसमेत प्रयोगमा ल्याएका छैनन् । बिग्रएको बाहाना बनाएर उनीहरुले यात्रुलाई ठग्ने प्रचलनमा थोरै पनि कमी नआएको निश्कर्ष ट्राफिक प्रहरीको नै छ ।
बिल प्रिन्टर जोडेकाहरुले पनि त्यसलाई नचलाएको पाइए पनि सरकारी तवरबाट कारवाहीका लागि प्रभावकारी कदम चालिएको छैन । मौसमी रुपमा १ देखि ३ हजार जरिवाना तिरेर छाड्दा ट्याक्सी चालकहरुको मनोबल झनै बढेको छ । ट्याक्सीले पनि सकेसम्म मिटरमा जानै नमान्ने र मिटरमा गुडे पनि यात्रुलाई बिल नै नदिने गुनासो बढेको बढ्यै छ ।
राजधानीमा सर्वसाधारणले ट्याक्सी भाडा महंगो भएको र ठगिने क्रम बढेको गुनासो गरेपछि बिलिङ प्रणाली जडान गर्न सुरु गरिएको थियो । तर, ब्यवसायीले यो सिस्टम एक पटक फेल भइसकेको भन्दै जडान गरे पनि प्रभावकारी नहुने दावी गरेका थिए ।
यो प्रणाली लागू भएपछि मिटरमा बदमासी गर्ने र मिटरअनुसार ट्याक्सी चलाउन आनाकानी गर्ने प्रवृत्तिमा नियन्त्रण हुने सरकारको विश्वास थियो । तर, जति गर्दा पनि ट्याक्सीहरु सुधि्रनै नसकेको ट्राफिक प्रहरीको भनाइ छ ।
‘अन्तर आत्मादेखि नै मैले सर्वसाधारणलाई ठग्नुहुन्न भन्ने नआएसम्म यो पपप्रवृत्ति नियन्त्रण गर्न गाह्रो हुन्छ, हाम्रो कारवाही अभियान पनि ठगीगर्नेहरुलाई सेचत गराउने उद्देश्यमै केन्द्रित छ,’ प्रवक्ता लम्सालले भने
