बाजुरामा खाद्यान्न अभाव, संस्थानकाे डिपाे रित्तियाे, जनता भोकभोकै
अार्थिक वर्षकाे अारम्भमै बाजुरामा खाद्यान्न अभाव भएकाे छ । वर्षाका कारण साँफे–मार्तडी सडकखण्डमा पहिरो गएपछि यातायात सेवा अवरुद्ध हुँदा खाद्य अभाव भएकाे हाे । सवारीसाधन सञ्चालनमा नआएपछि ढुवानी गर्न समस्या हुँदा खाद्यान्न अभाव भएको स्थानीयले बताएका छन् ।
मार्तडीस्थित नेपाल खाद्य संस्थानको डिपोमा मौज्दात २५० क्विन्टल चामल वितरण गरिसकिएकाे छ । अहिले गोदाम रित्तो छ । डिपोमा रहेको ३० क्विन्टल गहुँ वितरण भइरहेको नेपाल खाद्य संस्थान शाखा बाजुराले जनाएको छ ।
संस्थानले मोटो चामल प्रतिकिलो ३५ देखि ३९ तथा मसिनो सोना मनसुली ५० मा बिक्री गर्दै आएको छ । बजारबाट मोटो चामल प्रतिकिलो ४५ मा खरिद गर्नु परेको बडिमालिका नगरपालिका–३ का बालकृष्ण खड्काले बताए । नेपालगञ्ज र धनगढीबाट ढुवानी गरिँदै आएको चामल बाटोमै थन्किएको छ ।
डिपोमा चामल सकिएपछि रित्तै घर फर्कन बाध्य भएको बडिमालिका नगरपालिका–७ का हरिचन्द्र पाध्यायले बताए । “पूरै बजार चाहार्दा एक पेटी चाउचाउ मात्र भेट्टाए,” उनले भनेका छन् । यसअघि डिपोबाट दैनिक १० देखि २० क्विन्टलसम्म चामल बिक्री हुने गरेको थियो ।
खाद्य संस्थान बाजुराका प्रमुख मेघराज ओझा याे वर्ष खाद्यान्न ढुवानीका लागि ठेक्का नभएको र पुरानो ठेक्काअनुसार ढुवानी भएकाे चामल सकिएको बताउँछन् । सडक र हवाई सुविधा दुबै भएकाे बाजुरामा पटक-पटक खाद्यान्न अभाव हुँदै अाएकाे छ ।
