महाधिवेशनपछिको अध्यक्षका लागि नेकपामा चार नेताको भिडण्त सुरु, कस्को छ पल्ला भारी
दुई वर्षभित्र पार्टी महाधिवेशन गरी नयाँ अध्यक्ष छान्ने र सोही समयतिर नयाँ प्रधानमन्त्री पनि चयन गर्ने गरी नेकपाभित्र तानातान शुरु भएको छ । यसका लागि अहिले प्रदेश, जिल्ला, भातृ संगठनलगायत तल्ला कमिटीहरुमा आफ्नो पकड बलियो बनाउन नेताहरु लाग्न थालेका छन् ।
नेकपाको पारित विधानअनुसार दुई वर्षभित्र पार्टी महाधिवेशन गर्नुपर्ने बाध्यात्मक व्यवस्था छ । पार्टी महाधिवेशनले पार्टीको आगामी कार्यदिशा, विचार, सिद्धान्त, राजनीति, कार्यनीति, रणनीति, कार्यक्रम आदि तय गर्ने गर्दछ ।
तर नेकपाका नेताहरुको ध्यान नीतिमा नभएर नेताको कुर्सीहरुमा केन्द्रित हुन थालेको छ । महाधिवेशनबाट केन्द्रीय सदस्यहरु तथा अध्यक्ष, उपाध्यक्ष, महासचिव, उपमहासचिव, सचिवलगायतका पदाधिकारीहरु चयन हुने गर्दछ र उनीहरुले अर्को पाँच वर्ष पार्टी चलाउने गर्दछन् ।
नेकपामा अहिले सबै नेताहरु त्यसको तयारीमा केन्द्रित हुन थालेका छन् ।
जेठ ३ गते पार्टी एकता भएपछि केन्द्रीय समिति, स्थायी समिति र सचिवालय मात्रै बन्न सकेको छ । प्रदेश, जिल्ला र भातृ संगठनहरुको एकीकरण अझै पनि भएको छैन । कार्यदलहरुले दुवै पूर्व समूहबाट विभिन्न सिफारिशहरु गरेको छ ।
केही ठाउँमा बाँकी छ । तर, स्थायी समितिको बैठक विविध कारणले सरेको हुँदा निर्णय हुन सकेको छैन ।
सबै नेताहरु चुनिएरै महाधिवेशनमा आउनुपर्ने हुँदा अहिले तलका कमिटीहरुमा पकड जमाउन नेताहरुले ठूलै कसरत गर्न थालेको बताइन्छ ।
पार्टीका प्रदेश, जिल्ला, भातृ संगठनलगायत तल्ला कमिटीहरुमा आफ्नो पकड बलियो बनाउन नेताहरु लाग्न थालेकोले अहिले विवाद चर्कन थालेको एक स्थायी समिति सदस्यले दृष्टिलाई बताए । माधव नेपाल पक्षले ५ नम्बर प्रदेशमा आफ्नो समूहकालाई कत्लेआम गरी कहीँ पनि प्रमुख पदहरुमा नल्याएको प्रचार तीव्र पारेको छ । प्रम ओली निकट एक स्थायी समिति सदस्यले त्यस्तो कत्लेआम गर्ने नियत कसैको पनि नभएको र केही ठाउँमा सबै पक्षलाई समेट्न त्रूटि भएको हुनसक्ने बताए ।
अहिले कार्यदलहरुले केवल सिफारिश मात्रै गरेको र स्थायी समितिले निर्णय गर्ने बेलामा सबै पक्षलाई समेटेरै गर्ने उनले बताए ।
नेकपाका एक केन्द्रीय सदस्यले बताएअनुसार अध्यक्षका दाबेदार अहिलेसम्म ओली, प्रचण्ड, माधव नेपाल र वामदेव गौतम गरी चार जना छन् । झलनाथ खनालले पुनःअध्यक्ष बन्ने दाबी खुल्लारुपमा गरेका छैनन् । ईश्वर पोखरेल, घनश्याम भुसालहरुले सिधै अध्यक्षमा उम्मेदवारी दिन्छन् वा किङमेकरकै रुपमा रहन्छन् अझै स्पष्ट छैन ।
उता पूर्व माओवादी समूहमा बादल वा नारायणकाजीहरुले सिधै अध्यक्ष दाबी गर्ने स्थिति छैन भनिन्छ ।
ती केन्द्रीय सदस्यका अनुसार महाधिवेशनसम्ममा विविधखाले समीकरण बन्न सक्नेछ । पहिलो समीकरण, ओली र प्रचण्ड नै पार्टीका दुई अध्यक्ष प्रणालीमा अहिलेजस्तै रहने र तीन वर्षपछि प्रधानमन्त्री पद प्रचण्डलाई दिने । माधव नेपाल, वामदेव, बादल, ईश्वर पोखरेल, नारायणकाजी, घनश्याम भुसाल आदि सबैलाई सन्तुलित भूमिका दिई सर्वसम्मत नेतृत्व चयन गर्ने ।
दोस्रो समीकरण, ओली ५ वर्षको लागि प्रधानमन्त्री र पार्टीमा वरिष्ठ नेता बन्ने, प्रचण्ड र माधव नेपाल दुवै अहिलेजस्तै पार्टी अध्यक्ष बन्ने ।
तेस्रो समीकरण, ओली र प्रचण्डबीच फाटो आएमा पूर्व एमाले एक भएर ओली वा माधव नेपाललाई अध्यक्ष बनाउने वा पूर्व एमालेको कुनै समूह प्रचण्डसँग मिलेर प्रचण्डलाई अध्यक्ष बनाउने सम्भावना ।
नेकपाका एक स्थायी समिति सदस्यका अनुसार, आगामी महाधिवेशन पहिला एमालेमा हुने गरेजस्तै चुनावको विधिबाट नभई आपसी सहमतिमा गर्ने भन्ने टुंगो लागिसकेको छ र यो विधानमा पनि उल्लेख छ । उनका अनुसार सबभन्दा राम्रो यो नै हो । तर चुनावै नहोला भन्न पनि सकिन्न । उनका अनुसार अहिले प्रम ओलीले धेरैलाई असन्तुष्ट बनाएकाले त्यो बेला समीकरण बदलिने सम्भावनालाई पूरै इन्कार गर्न सकिन्न ।
प्रचण्डको भने जसरी भए पनि एकीकृत नेकपाको अध्यक्ष र देशको प्रधानमन्त्री एक पटक बनेरै छाड्ने लक्ष्य रहेको बताइन्छ । यसका लागि उनी पूर्व एमालेका कुनै पनि समूहहरुलाई चिढ्याउने पक्षमा रहेका छैनन् ।
सके सर्वसम्मत अध्यक्ष बन्ने, नभएमा जुन समूहले आफूलाई अध्यक्ष बन्न सहयोग गर्दछ, उसैसित मिलेर अध्यक्ष बन्ने रणनीति प्रचण्डको रहेको बताइन्छ ।
पूर्व माओवादीका एक केन्द्रीय सदस्यका अनुसार अहिले जस्तै ओली र प्रचण्ड पार्टीको अध्यक्ष रहने तथा तीन वर्षपछि प्रचण्ड प्रधानमन्त्री भएर ५ वर्षपछिको चुनाव गराउने समीकरणमा प्रचण्डले आफूलाई अलि बढी सुरक्षित ठानेका छन् ।
तर, महाधिवेशन नजिकिँदै जाँदा परिस्थिति परिवर्तन हुनसक्ने तर्फ पनि उनी सचेत रहेको बताइन्छ ।
अहिले प्रदेशदेखि तलका कमिटीहरुको एकतामा पार्टीका प्रमुख पदहरु र कमिटी सदस्यहरुमा पूर्व माओवादी पक्षको ३५ देखि ४५ प्रतिशतसम्म परेको छ । कहीँ कहीँ माओवादी पक्षको ५५ प्रतिशतसम्म पनि सिफारिश भएको छ । पूर्व माओवादी पक्षका एक स्थायी समिति सदस्यका अनुसार पूर्व माओवादी पक्ष आगामी महाधिवेशनमा एक ढिक्का नै रहने निश्चित छैन ।
बादल, नारायणकाजी, मणि, मातृका, देवेन्द्र पौडेल, लेखराज भट्ट, महरा, वर्षमान, जनार्दनहरुका साना ठूला समूहहरु त्यहाँ पनि रहेको बताइन्छ । पूर्व एमाले र पूर्व माओवादीका विभिन्न समूह तथा उपसमूहहरुसहित हुने आगामी महाविधेशनमा गुट उपगुटहरुको नयाँ नयाँ समीकरण बन्ने सम्भावना रहेको ती स्थायी समिति सदस्यले बताए ।
स्थायी समिति बैठक असोजमा मात्रै हुने सम्भावना रहेको छ ।
प्रचण्ड यसबीचमा भारत जाने पक्का भएको छ भने फर्केलगत्तै चीन जाने सम्भावना पनि रहेको छ । यसबीचमा नारायणकाजी पनि चीन जाँदैछन् । अब बस्ने स्थायी समिति बैठकमा आगामी महाधिवेशनका लागि आ–आफ्नो आधार तयार पार्न तलका समितिहरुमा आफ्ना मानिसहरु राख्न तानातान तीव्ररुपमा हुने भएको छ ।
सरकारको काम कारवाहीका बारेमा पनि छलफल हुुनुपर्ने माग स्थायी समिति सदस्यहरुको रहेको छ । आगामी स्थायी समिति बैठक राम्रो तयारी गरेरै मात्र बस्ने स्थिति हुनाले अझ ढिला हुने हो कि भन्ने आशंका गरिएको छ । यसपछि संगठित सदस्यता संख्या टुंग्याउने र महाधिवेशन प्रतिनिधिहरुको तयारी गर्ने काम पनि तनावपूर्ण अन्तरसंघर्षको विषय हुने बताइन्छ ।दृष्टि साप्ताहिकबाट