पाँचवटा रेडपान्डासहित राजधानीबाट दुईजना पक्राऊ
प्रहरीले काठमाडौँबाट दुर्लभ वन्यजन्तु रेडपान्डासहित दुईजनालाई पक्राउ गरेको छ । राजधानीको चाबहिलबाट टुकुचातर्फ लाँदै गरेको अवस्थामा सोलुखुम्बु निवासी दुईजनाबाट प्रहरीले पाँचवटा रेडपान्डा जीवितै बरामद गरेको हो ।
महानगरीय प्रहरी वृत्त दरबारमार्गका प्रमुख डिएसपी दानबहादुर मल्लका अनुसार गम्भीर अवस्थामा जीवितै समातिएका ती रेडपान्डा मरिसकेका छन् । ती रेडपान्डालाई सोलुखुम्बुबाटै ल्याइएको हुन सक्ने आशंका मल्लले गरे । अनुसन्धान भइरहेकाले पक्राउ परेका दुईजनाको नाम खुलिनसकेको उनले बताए ।
मल्लका अनुसार बरामद गरिएका रेडपान्डा बयस्क अवस्थाका छन् । यसअघिको समयमा रेडपान्डाका छालामात्रै बरामद हुने गरेका थिए । सम्भवत पहिलो पटक जीवितै रेडपान्डा प्रहरीले बरामद गरेको हो ।
