फोहोर बोकेको ट्रकको ठक्करबाट एक महिलाको मृत्यु ,ओखरपौवामा तनाव, काठमाडौंको फोहोर उठ्न बन्द
ट्रकको ठक्करबाट एक महिलाको मृत्यु भएपछि ओखरपौवा तनावग्रस्त बनेको छ ।
फोहोर बोकेको बा २ ख ६११८ नम्बरको ट्रकले बिहान करिब ५ बजेतिर ककनी गाउँपालिका–१, महालक्ष्मीस्थानका ४९ वर्षीय पदम बलामीको ज्यान लिएपछि स्थानीयले गाडी रोकेर अवरोध गरेका हुन् ।
प्रहरीले स्थानीयले दोषीमाथि कारबाही तथा क्षतिपूर्तिको माग राखेर प्रदर्शन गरेपछि सवारी आवागमन प्रभावित भएको जनाएको छ ।
स्थानीयको प्रदर्शनपछि अहिले पासाङल्हामु राजमार्ग भएर आवतजावत गर्ने सवारी दुवैतर्फ रोकिएका छन् ।
ओखरपौवा प्रहरी चौकीका प्रहरी हवल्दार कुवेर रातउले दुई पक्षलाई राखेर मिलाउने प्रयास भइरहेको जनाएको छ ।
घटनाको विरोधमा स्थानीयबासीले सडक अवरुद्ध गरेका कारण फोहोर बिसर्जन कार्य समेत प्रभावित भएको छ । काठमाडौंबाट फोहोर बोकेर नुवाकोट पुगेका सबै गाडीहरु काठमाडौंतिर नै फर्किएका छन् ।
उक्त घटनापछि काठमाडौंको फोहोर उठ्न पनि बन्द भएको छ ।
