बल्खु तरकारी बजारमा विहानैदेखि तनाव, अनुगमन टोलीमाथि अभद्र व्यवहार
काठमाडौंको बल्खुस्थित तरकारी बजारका व्यवसायीहरू आज एकाविहानैदेखि बल्खुचोकमा उत्रिएर विरोध प्रदर्शन गरिरहेका छन् । उद्योग बाणिज्य तथा आपूर्ति विभागको अनुगमन टोलीले सोमबार विहान झिसमिसेमै बल्खुस्थित तरकारी बजारमा छापा मारेपछि व्यवसायी र अनुगमन तोलीबीच झडपको अवस्था पैदा भएको र अनुगमन टोलीमाथि नै अभद्र व्यवहार गर्ने व्यवसायीलाई प्रहरीले नियन्त्रणमा लिएपछि विरोध प्रदर्शन शुरु गरिएको हो ।
उद्योग बाणिज्य तथा आपूर्ति विभागका अधिकृत दीपक पोखरेलको नेतृत्वमा अनुगमनका लागि गएको टोलीले बल्खु तरकारी बजारका सञ्चालक मोहन बस्नेतलाई विभागमा सोमबार नै आएर स्पष्टिकरण पेश गर्न निर्देशन दिएको बुझिएको छ । अवैधानिक रूपले कारोबार गरिएको, व्यवसाय दर्ता नगरिएको पाइएपछि सोबारे सोधपुछ गर्दा अनुगमन टोलीमाथि अभद्र व्यवहार गर्ने रवि साह नामक तरकारी व्यापारीलाई प्रहरीले नियन्त्रणमा लिएको छ ।
