बैतडीमा विधुरलाई पनि मासिक एक हजार
वैतडीमा एक नगरपालिकाले विधुर (एकल पुरुष) लाई पनि मासिक भत्ता दिने भएको छ ।
सामाजिक सुरक्षा भत्ता अन्तर्गत जिल्लाको मेलौली नगरपालिकाले ६० वर्षमाथिका विधुरहरुलाई मासिक एक हजारका दरले भत्ता वितरण गर्ने निर्णय गरेको हो ।
नगरपालिकाभित्र केही त्यस्ता असहाय पुरुषहरु पनि रहेकोले उनीहरुलाई जीउन सहज होस् भनी आफूहरुले भत्ता दिने निर्णय गरेको मेयर कृष्णसिंह नायकले बताए ।
उनीहरुको मासिक भत्ताका लागि नगरपालिकाबाट अहिले १५ लाख रुपैयाँ छुट्याइएको मेयर नायकले जानकारी दिए ।
अहिले नगरका ९ वटै वडाका विधुरहरुको तथ्यांक संकलनको काम सुरु गरिएको छ । ‘१५ लाख वजेट छुट्याएका छौं । अहिले तथ्यांक संकलनको काम भइरहेको छ,’ उनले भने, ‘सामाजिक सुरक्षा भत्ता वितरणकै क्रममा वितरण गर्छौ ।’
एकल पुरुषलाई मासिक भत्ता वितरण गर्ने सम्भवतः यो नगरपालिका नेपालकै पहिलो बनेको छ ।
यसअघि नगरपालिकाले एचआईभी संक्रमित, हेमटाइटिस, क्यान्सर जस्ता रोगका बिरामीको प्रकृति हेरेर उपचार खर्चसमेत बितरण गरेको थियो ।
