नेपाली सेनाको खातामा ४१ अर्ब भन्दा बढी रकम
नेपाली सेनासँग लगानी र नगद मौज्दात गरी ४१ अर्व २९ करोड ८२ लाख ४६ हजार रुपैंयाँ रकम रहेको छ ।
बुधबार नेपाली सेनाको जङ्गी अड्डामा सैनिक कल्याणकारी कोषले पत्रकार सम्मेलन गरी आफूसँग भएको नगद र लगानी रकम सार्वजनिक गरेको हो । यसैगरी समस्याग्रस्त बैंक तथा बित्तीय संस्थाबाट २२ करोड ९० लाख ६७ हजार रुपियाँ रकम सावाँ रकम स्वरुप प्राप्त गर्नुपर्ने स्थितिमा रहेको पनि कोषले बताएको छ ।
मौज्दात रहेको रकममध्ये नगद मौज्दात ३५ अर्ब ७७ करोड २४ लाख ५६ हजार रहेको छ भने लगानीतर्फ ५ अर्ब ५२ करोड ५७ लाख ८७ हजार छ । गत बर्ष कोषको कूल रकम ३४ अर्ब ५६ करोड ६१ लाख ५७ हजार रहेकोमा त्यसमा बृद्धि भई ३५ अर्ब ७७ करोड २४ लाख ५६ हजार पुगेको हो ।
यस हिसावले एक बर्षको अवधिमा सैनिक कल्याणकारी कोषले विभिन्न बैंकमा राखेको रकमबाट ब्याज र अन्य आम्दानीबाट नेपाली सेनालाई १ अर्ब रुपैंयाँ भन्दा बढी नाफा भएको देखिएको छ ।
