विराट मेडिकल कलेजमा डाक्टरको लापरवाहीले सुत्केरीको ज्यान गयो, अस्पताल तनाबग्रस्त
मोरङमा डाक्टरको लापरबाहिका कारण एक गर्भवती महिलाको ज्यान गएको छ । बुढीगंगास्थित विराट मेडिकल कलेज टिचिङ अस्पतालमा डाक्टरको लापरवाहिले इटहरी १३ खनारकी २५ वर्षिय गर्भवती महिला सगिरा खातुनको ज्यान गएको हो ।
डाक्टरका लापरबाहीका कारण गर्भवती महिलाको मृत्यु भएको भन्दै मृतकका आफन्तहरु लगायतले नाराबाजी गर्दै अस्पताल घेराउ गरी अस्पतालको मुल गेट नै बन्द गराएका छन् ।
एक हप्ता अघि अस्पतालमा आएकी महिलाको बुधबार राती नै मृत्यु भएतापनि डाक्टरहरुले बिहिबार मात्रै खबर गरेपछि उनीहरुले अस्पतालमै नाराबाजी गरेका हुन् । मृतकका आफन्तले अस्पताल घेराउ गर्दा स्थिति तनावग्रस्त बनेको छ ।
यसअघि पनि पटक–पटक विराट मेडिकल कलेज टिचिङ अस्पतालले धेरै मानिस मारिसकेको भन्दै मृतकका परिवारले यस पटक कुनै मिलापत्र नगर्ने बताएका छन् । उनीहरुले अस्पताल नै बन्द गराउने चेतावनी समेत दिएका छन् ।
मृतक महिलाको काका ससुरा समिम अख्तरका अनुसार, सगिरा खातुनलाइ उच्च रक्तचापको समस्या भएको थियो । ‘डेलीभरी गराउने समय २ महिना बाँकी हुँदा डाक्टरहरुले अपरेशन गराएपछि मृत्यु भएको हो’ उनले भने ।
महिलाका आफन्तले चिकित्सकको लापरबाहिले महिलाको मृत्यु भएको भन्दै आन्दोलन सुरु गरेका हुन् । उनीहरुले बिहीबार बिहानदेखि अस्पतालमा धर्ना दिएका छन् ।
स्थिति तनावग्रस्त भएपछि अस्पतालमा बाक्लो सुरक्षाकर्मी परिचालन गरिएको छ ।
उता अस्पताल प्रशासनले भने महिलालाइ भेन्टिलेटरमा राख्नुपर्छ भन्दा आफ्न्तहरुले नै नमानेपछि मृत्यु भएको जिकिर गरेको छ । प्रशासनका अनुसार बच्चा भेन्टिलेटरमा सुरक्षित रहेको छ ।
