पूर्व प्रधानमन्त्री एवं नेकपाका नेता माधवकुमार नेपालले जोरपाटी साँखु सडकखण्डको काम तत्काल सक्न निर्देशन दिएका छन् ।

विहीवार चाबहिल–बौद्ध–जोरपाटी–साँखु सडक खण्डको अनुगमन गदै काठमाडौं निर्वाचन क्षेत्र नम्बर दुईका सांसद समेत रहेका नेता नेपालले काममा ढिलाइ गर्नेमाथि कारबाहीको चेतावनी दिएका हुन् ।

भौतिक योजना तथा यातायात मन्त्री रघुवीर महासेठ, प्रदेश सांसद रामेश्वर फुयाल, मन्त्रालयका सचिब, सडक विभागका प्रमुख र ठेकेदारसहित अनुगमनमा पुगेका नेता नेपालले १५ दिन पछि पुन अनुगमनमा आउँदा सडकको अवस्था सुधार हुनुपर्ने बताए ।

निर्माणको जिम्मा पाएका ठेकेदारले भने,‘अब हजुर १५ दिन पछि आउँदा खाल्डाखुल्डी पुरिने छ ।’

नेता नेपालले सडक निर्माणका क्रममा एउटा निकायले अर्को  निकायलाई देखाएर पन्छन खोज्ने प्रवृत्ति रहेको भन्दै त्यसलाई देखाएर कोही पनि उम्कन नापाउने बताए ।

नेता नेपालले भने,‘सडक निर्माणमा सम्बन्धित सडक विभाग, विद्युत प्राधिकरण, ढल व्यवस्थापन गर्ने सबैले समन्वय गर्न आवश्यक छ’ नेता नेपालले भने,‘त्यसका लागि सम्बन्धित पक्ष जिम्मेवार हुन जरुरी छ ।’

सडक निर्माणका क्रममा विभिन्न अवरोध आएका कारण काममा ढिलाई भएको निर्माण व्यवसायीले बताएपछि नेता नेपालले सम्बन्धित सवै पक्षलाई राखेर तत्काल कामको निर्देशन दिएका थिए ।

स्थानीयवासीले भने नेता नेपालले अनुगमन गर्ने भएपछि ठेकेदारले हिजो(बुधबार) खाल्डाखुल्डी पुर्ने र सडक सफा गर्ने कार्य गरेको भन्दै अनुगमन हल्ला नगरि गर्न सुझाव दिए ।

पहिला दुई वटा घरका कारण निर्माणको काम रोकिएको भएपनि अहिले उक्त घरहरु भत्किएको र अव निर्माणको कम तिव्ररुपमा अघि बढ्ने ठेकेदारले आश्वासन दिए ।

मन्त्रीलाई बौद्धबासीले भने-पानी पर्दा पनि अनुगमनमा आउनुस्

बुधबार विहान चाबहिल-बौद्ध सडक खण्डमा एकाएक भौतिक पूर्वाधार तथा यातायातमन्त्री रघुबीर महासेठ दलबलसहित देखा परे ।

उनको साथमा सत्तारुढ नेकपाका वरिष्ठ नेता एवं पूर्वप्रधानमन्त्री माधवकुमार नेपाल, प्रदेशसभा सांसद रामेश्वर फुयाँल, सडकका हाकिमहरु पनि थिए ।

मन्त्री महासेठ कहिले ढलको पाइप राख्न लागेको खाल्डोमा पसे त कहिले पाइप हेर्थे ।

वर्षासम्म पानी पर्दा हिलो र काम लाग्दा धुलो खाँदा पनि कसैले वास्ता नगरेको सडकमा दलबलसहित मन्त्री आएको देखेपछि स्थानीयबासीहरुले पनि पछ्याए ।

स्थानीयबासीले मन्त्री महासेठलाई पानी परेको बेला अनुमगनमा आउन निम्तो दिएका छन् । एकले भने, ‘पानी पर्दा आउनुस्, सडकमै भेल, बाढी पोखरी सबै देख्न पाइन्छ ।’

स्थानीयले बिमस्टेक सम्मेलनका लागि सडक निरीक्षणमा आउनुभएको हो भन्ने प्रश्न समेत गरे ।

मन्त्री महासेठले भने जनताको समस्या र पीरमर्का बुझेर सडक मर्मतको काम अघि बढाएको बताएका छन् । ‘भदौ १२ गतेपछि सडकमा कुनै खाल्डा रहँदैन । पिच गर्न त केही समय लाग्ला । खाल्डाखुल्डी सबै पुर्छौं,’ उनले भनेका छन् ।