प्रधानन्यायाधीशमा दीपकराज जोशीको सिफारिस अस्वीकार गर्नुको कारण यसरी खुलाए प्रधानमन्त्री ओलीले
प्रधानमन्त्री केपी शर्मा ओलीले प्रधानन्यायाधीशमा दीपकराज जोशीको सिफारिस र अस्वीकार गर्नुका कारण खुलाएका छन् । उनले न्यायपरिषद्बाट आएको सिफारिसलाई संवैधानिक परिषद्ले अघि बढाएको तर, सुनुवाईका क्रममा विवादहरु आएपछि अस्वीकार गर्ने निर्णयमा पुगेको बताएका छन् ।
प्रधानमन्त्रीको सरकारी निवास बालुवाटारमा बसेको नेकपाको बैठकमा पार्टी अध्यक्षसमेत रहेका ओलीले ‘अनुमोदन नगर्ने भनेर पठाएको होइन । केही कुरा आएपछि गर्न नमिल्ने जस्तो देखियो’ त्यसैले अस्वस्कार गरिएको प्रष्ट पारेका छन् ।
यस्तै प्रधानमन्त्री ओलीले कांग्रेस सरकारलाई जसरी हुन्छ असफल पार्नुपर्छ भनेर लागेको बताएका छन् । प्रमुख प्रतिपक्ष कांग्रेस बेलाबेला उदण्ड ढंगले प्रस्तुत हुन थालेको उनको विश्लेषण थियो । कांग्रेस त्यसरी आउनुमा अन्तर्राष्ट्रिय आयामहरु पनि होलान् भन्दै पश्चिमाहरुतिर संकेत गरेका छन् ।
राष्ट्रियता र शान्ति सुरक्षालाई खलल र्पुयाउन सीके राउतलगायतका शक्तिहरु सक्रिय भएको पनि प्रधानमन्त्री ओलीको विश्लेषण रहेको छ । उनले भारत र चीन दुबै छिमेकीसँग सम्बन्ध राम्रो भएको तर, प्रमुख विपक्षी दल कांग्रेस जसरी हुन्छ सरकारलाई असफल बनाउन योजनामा लागेको उनको दाबी थियो ।
यसैगरी सम्बोधनका क्रममा प्रधानमन्त्री ओलीले सरकारको छिमेकी मुलुकहरुसँग सम्बन्धबारे पनि नेताहरुलाई जानकारी गराएका छन् । पछिल्लो समय भारतसँग सम्बन्ध सुधार भएको र भारतीय प्रधानमन्त्री नरेन्द्र मोदी पक्ष नेपाल र आफ्नो सरकारप्रति निकै उदार देखिएको उनको भनाइ छ ।
यद्यपि भारतको कांग्रेस लगायतका शक्तिले भने अहिले पनि विभिन्न बहानामा खेल्ने खोजेको उनले बताएका छन् । अर्को छिमेकी चीनसँग पनि सम्बन्ध राम्रो भएको प्रभानमन्त्री ओलीको भनाइ रहेको छ ।
नेताहरुका अनुसार बुधवारको बैठक प्रधानमन्त्रीको सम्वोधन पछि स्थगित भएको छ । बैठक भोली विहिवार फेरी बस्ने भएको छ । भोली फेरी बस्ने बैठकमा सांगठनिक विषयमा छलफल हुनेछ भने सरकारको कामकारबाहीको समीक्षा गर्न छिट्टै स्थायी कमिटी बैठक बोलाउने सम्भावना रहेको बताईएको छ ।