नेपाल प्रहरीको प्रसंसनीय काम, यसकारण सही छ भक्तपुरको पाइलट बाबा जंगल इन्काउन्टर

हाम्रो इकोनोमि

 

गत आइतबार राती काँडाघारीबाट अपहरणमा परेका ११ वर्षीय बालक निशान खड्कालाई सकुशल उद्धार गर्ने प्रहरीको प्रयत्न सफल हुन सकेन । सिन्धुपाल्चोकको ज्यामिरे घर भई काठमाडौंको काँडाघारी बस्दै आएका खड्का पुरानो सिनामंगलमा रहेको हाइल्यान्ड इंग्लिस स्कुलमा कक्षा ६ का जेहेन्दार छात्र थिए ।

 

आइतबार उनी सबै कक्षा पढेर त्यसपछि गणित तथा विज्ञानको ट्युसन सकी घर गए । घरबाट अंकल भनिने गोपाल तामाङसँग मोवाइल् किन्न पसल गए । पसलबाट ११ सय रुपैयाको मोवाइल किनी मागेर उनी राख्नका लागि भन्दै आमाले चलाएको होटलमा पुगे । गोपाल अंकलले किनिदिएको भन्दै मोवाइल बुझाए । खाजा खाएर खेल्न भन्दै बेलुका साढे पाँच बजेतिर निस्किए ।

 

आमाले चलाएको होटलमा बसेर घरतर्फ लागेका उनी घरमा पुग्नै पाएनन् । बाटैमा गोपाल अंकल र उनका साथीले साथमै लिएर गए । उनलाई अपहरण गरिएको थियो तर निशानले आफू अपराधीको जालमा परेको सुइकोसम्म पाएका थिएनन । अंकलसँग घुम्न गएको निशानको बुझाइ थियो ।

 

अपराधीहरूले अपरहणपछि उनकी आमालाई राती ९ बजे ४० लाख रुपैयाँ फिरौती माग गरे । प्रहरीलाई भने छोरा मारिदिने धम्की पनि संगै दिए । बाबु वैदेशिक रोजगारीमा भएको सामान्य परिवारसँग त्यति ठूलो रकम फिरौती दिनसक्ने अवस्था थिएन । आफ्नो छोराको खोजीका लागि आमा चमेली खडकाले छिमेकी गुहारिन ।

 

छिमेकीको सहयोगमा प्रहरीसम्म जानकारी गराइयो । तर, अभियुक्तले आफ्नो पहिचान खुल्ने डरले राती नै बालकको हत्या गरी खाल्डो खनेर गाडे । बालकको सकुशल उद्धार गर्न तत्काल प्रहरी टोली परिचालन भयो । रातको समयमा प्रहरीले मोवाइलको लोकेशन पत्ता लगाउने प्रबिधिको पहुँचमा पुग्न नसक्दा अभियुक्तहरु कहाँ छन भन्ने जानकारी पाउन सकेन । सोमबार बिहान प्रहरीले भक्तपुरको बोडेमा ११ बर्षीय निशानको शव भेट्यो । यसका आधारमा महानगरीय अपराध महाशाखाको टोलीले अपराधीको पिछा गर्दै गयो ।

 

भक्तपुरको डोलेश्वरतर्फ जाँदै गर्दा पाइलटबाबा जंगलमा दुई जना अपराधीसँग जम्काभेट भयो । फायरिङ गर्दै भाग्न खोजेका अपराधीमाथि प्रहरीले पनि गोली चलायो । गोली लागि अपहरणमा संलग्न तिनै अंकल गोपाल तामाङ र अजय तामाङ मारिए । घटनास्थलबाट एउटा पेस्तोल, दुई राउन्ड गोली र फिरौती माग्न प्रयोग भएको सिम बरामद भएको अपराध अनुसन्धान महाशाखाका प्रवक्ता एसपी नरेन्द्र उप्रेतीले जनाएका छन् ।

 

अपहरित बालकको सकुशल उद्धार हुन नसक्नु अत्यन्त दुःखद् भए पनि अपराधीहरू उम्कन नपाउनु सुखद पक्ष हो । यस मानेमा नेपाल प्रहरीको कदमलाई सराहना गर्नै पर्छ । जघन्य अपराधीहरूलाई ठाउँको ठाउँ ठेगान लगाउन नसक्दा यस्ता जघन्य अपराधका घटना पटक पटक दोहोरिने गरेका छन् ।

 

पक्राउमा परेका जघन्य अपराधीहरू कानुनका अनेकौं छिद्र प्रयोग गर्दै तथा माथिल्लो पहुँच प्रयोग गर्दै उम्कने गरेका थुप्रै उदाहरणहरू छन् । ठाउँको ठाउँ ठेगान लगाउने हो भने यस्ता अपराधीहरूको मनोबल गिर्छ र जघन्य अपराधका घटनामा कमी आउँछ । यो कुरा विगतमा पनि देखिएको हो ।

 

 

केही वर्षअघि दिनेश अधिकारी चरी तथा कुमार घैंटेलाई ठाउँको ठाउँ ठेगान लगाइएपछि अपराधका घटनामा कमी आएको थियो । त्यतिवेला चरीलाई इन्काउन्टर गरिएकोमा धादिङका एमाले नेता र घैंटेलाई इन्काउन्टर गरिएकोमा कांग्रेस नेताले संसद्मा प्रहरीको चर्को आलोचना गरेका थिए । अपराधीहरूको राजनीतिक पहुँच कहा“सम्म हुँदो रहेछ रु भन्ने कुरा ती दुईवटा घटनाले छताछुल्ल बनाएको थियो । तर त्यतिवेला अपराध महाशाखाको कमाण्ड सम्हालेका सर्वेन्द्र खनालले कत्ति पनि खुट्टा कमाएनन् ।

 

 

उनै खनाल यतिवेला नेपाल प्रहरीका आइजिपी छन् । तर, उनी आइजिपी भएपछिको अवधिमा फेरि अपराधका घटना एक्कासी बढेका छन् । खासगरी, बालिका बलात्कृत भएका समाचार नआएको कुनै साता छैन । हरेक साता आङ नै सिरिंग हुने गरी बलात्कारका समाचार आउने गरेका छन् ।

 

 

बलात्कारीलाई पक्राउका लागि ठूलो जनदबाब दिनुपर्ने अवस्था सिर्जना भएको छ । मुलुकमा प्रहरी प्रशासन नै छैन कि भने जस्तो महसुस हुनेगरी बलात्कारका घटना बढिरहेको वेला भक्तपुरमा अपहरणकारीमाथि गरिएको इन्काउन्टरको समाचारले जनतालाई केही राहत दिएको छ ।

 

पहिलो पटक आपराधिक घटना चाहने एकाध बदमासबहेक आम नागरिकले इन्काउन्टरलाई सही भन्ने सन्देशसहित खुसियाली मनाइरहेका छन । सामाजिक सञ्जालमा आएका अभिब्यक्ति त्यसैको प्रमाण हो । अव अपराधीमाथि प्रहरीको कदम निकै कठोर हुनुपर्छ भन्ने नागरिकको चाहना पनि यस्मा ब्यक्त भएको छ । बलात्कारीमाथि पनि प्रहरीले यस्तै कदम चालोस् ।

 

बलात्कारको अभियोगमा पक्राउ परेकाहरू आफ्नो राजनीतिक तथा आर्थिक पहुँच प्रयोग गरी अदालतबाट सफाइ पाएका समाचार पनि आउने गरेका छन् । जघन्य अपराधमा संलग्न हुनेहरूलाई समेत मृत्युदण्ड दिने कानुनी व्यवस्था नभएका कारण अपराधका घटना नियन्त्रणमा नआएका हुन् कि रु भन्ने पनि आमनागरिकलाई लाग्ने गरेको छ ।

 

तर, पहुँचवाला अपराधीहरूले नक्कली अपराधी खडा गर्ने गरेको पनि देखिएको छ । मृत्युदण्डको कानुन बनाउँदा वास्तविक अपराधीले उन्मुक्ति पाउने र नक्कली अपराधी सुलीमा चढ्ने सम्भावना हाम्रो मुलुकमा ज्युका त्यु छ । त्यसैले, कार्यक्षेत्रमा खटिएका प्रहरीले मुलुकको कानुनी अवस्था तथा कमजोरीलाई ख्याल गर्दै ठाउँको ठाउँ आफ्नो विवेक प्रयोग गर्नुपर्छ ।

 

सोमबारको घटनामा फिल्डमा खटिएका प्रहरीले आफ्नो विवेक प्रयोग गर्दै जनताको मन जितेका छन् । नेपाल प्रहरीले यसैगरी अपराधीको इन्काउन्टर गर्दै नागरिकको मन जित्ने काम गर्नुपर्छ । अपराधीको मानव अधिकार भन्दै बिदेसीको डलर लिएर आउने जोकोहीसँग नागरिक आफै प्रतिवादमा उत्रनेछन । प्रहरीले अपराध र अपराधीमुक्त समाज निर्माणका लागि यही उत्तम समय हो ।