नुरप्रसाद बाबुको लास किन उठाउँदैनन,आमालाई मृत्युशैयामा बस्न किन जबर्जस्ती गर्छन् , यस्तो छ कारण
भाइ कृष्णप्रसाद अधिकारीको २०६१ सालमा माओवादीले हत्या गरेपछि विक्षिप्त बनेका नुरप्रसाद अधिकारी साउन २० गते लामो समयको भूमिगत बसाइपछि सार्वजनिक भएका छन् ।
उनकी वीरअस्पतालमा उपचाररत आमा गंगामायाले सरकारलाई छोरा खोजिदिन आग्रह गरेपछि उनलाई प्रहरीले खोजी गरी आमाको जिम्मा लगाएको हो ।
वीर अस्पतालमा आमासंग रहेका नुरप्रसादले भने सामाजिक संजालमा विचार राख्दै भनेका छन् –‘मेरो स्वतन्त्रता र स्वाभीमानमा अंकुश लगाउने अनि मलाई बुबाको लास र आमाको मृत्युशैयामा जबर्जस्ती दलाली गर् नत्र राम्रो हुँदैन भनेर जबर्जस्ती माओवादी सरकारले उच्च अदालत पाटनको गेटैबाट साउन २० गते समातेर राखेको छ ।
आमासित पनि भेट भयो । मलाई समात्ने पुलिसलाई मैले बुबाको लास र आमाको मृत्युशैया व्यापारी नबनाउ आमाको न्यायको काम गर भनेर बसेको भनेको छु ।’
उनले अगाडि लेखेका छन् –‘जबर्जस्ती समातेर लासमा तैले राजनीति र व्यापार गर्नुपर्छ भन्ने गरिँदै आएको छ । यो मबाट स्वीकार्य छैन । माओवादी सरकारले चरित्र हत्या गर्ने अनि आफूजस्तै व्यापारी र अपराधी बन्न दबाब चर्को दिइरहेको छ । आज यो कुरा सार्वजनिक गर्न पाएको छु ।’
यसबाट अझै स्पष्ट हुन्छ कि अहिलेको सरकारले नुरप्रसादलाई दबाब दिइरहेको छ । कृष्णप्रसादको हत्या भइसकेपछिका जति पनि गतिविधि भए ती अब मानवअधिकारका विषय हुन् । अब नुरप्रसादको मात्र विषय एक्लो भएन । कृष्णप्रसादका हत्यारालाई कार्वाही गर्न माग राख्दै आमरण अनसनमा बसेका उनका बुबा नन्दप्रसादको २०७१ साल असोज ६ गते आमरण अनसनकै अवस्थामा वीर अस्पतालमा मृत्यु भएको थियो ।
सरकारले त्यतिबेलै उनको शव शिक्षण अस्पताल महाराजगञ्जमा राखेको थियो । अहिले पनि शब त्यहीं छ भनिएको छ । नन्दप्रसादको दाहसंस्कारसमेत हुन सकेको छैन । त्यसउप्रान्त गंगामाया निरन्तर अनसनमै छिन् ।
उनी वीर अस्पतालमै रहेकी छिन् ।
यसअघि तत्कालीन माओवादीका अध्यक्ष एवं पूर्व प्रधानमन्त्री पुष्पकमल दाहाल प्रचण्ड र पूर्व प्रधानमन्त्री डा बाबुराम भट्टराईले समेत खुलेआम कृष्णप्रसादको हत्या माओवादीले नै गरेको स्वीकारेका थिए ।
यसरी स्वीकार्दासमेत हत्यारालाई कार्वाही हुन सकेको छैन । केही समयअघि हत्यामा संलग्न भनिएका १३ जनामध्येका एक छविलाल पौडेलले भने सर्वोच्च अदालतमा आत्मसमर्पण गरेका थिए ।
पौडेल अहिले डिल्लीबजारस्थित चारखाल कारागारमा रहेका छन् । पौडेल जेल गएपछि पनि प्रचण्डले फेरि बोलेका थिए –मेरै आग्रहमा पौडेलले आत्मसमर्पण गरेका हुन् । यसले नेपाल कम्युनिष्ट पार्टीको राजनीति थप स्पष्ट हुन्छ । प्रचण्डले यसो भनिरहँदा उनका पार्टीका अर्का अध्यक्ष एवं प्रधानमन्त्री केपी शर्मा ओली पनि यो राजनीतिका हकदार भएका छन् ।
यो मानवहत्याको राजनीतिमा नुरप्रसादको सामाजिक संजालबाट दिइएको सन्देशले तत्कालीन माओवादी एवं अहिलेका नेपाल कम्युनिष्ट पार्टीका नेताहरुले नुरप्रसादलाई सहमति गर्न दबाब दिएको बुझिन्छ ।
यसैबीच, चितवन जिल्ला अदालतमा कृष्णप्रसादको फाइल फेरि खुलेको छ । भाइको हत्यापछि नुरप्रसाद र बाबु नन्दप्रसादले हत्यारालाई कार्वाही गर्न निवेदन दिएका थिए ।
अदालतले निवेदक नुरप्रसादलाई झिकाउने आदेशसमेत दिइसकेको छ ।
यता, मानवअधिकारकर्मी चरण प्रसाईका अनुसार नुरप्रसादलाई अदालतप्रति विश्वास छैन । उनको भनाई उधृत गर्दै प्रसाईले भने, ‘उहाँलाई अदालतको गतिविधिप्रति विश्वास छैन, लामो समय अल्झाएर राजनीति गरेको उहाँको ठहर छ ।’