छुरा प्रहार गरी भतिजले गरे काकाको हत्या, यसरी परे अपराधी प्रहरीको खोरमा
जनकपुरधाम-गोली हानी एक युवकको हत्या भएको तीनदिन नबित्दै धनुषामा फेरी एकजनाको छुरा प्रहार गरी हत्या भएको छ । जनकपुर उपमहानगरपालिका वडा नम्बर १९ बेंगाशिवपुरमा ५२ वर्षिय रामवृक्ष यादवको छुरा प्रहार गरी हत्या भएको हो ।
दुई दाजुभाइबीचको झगडामा छुरा चल्दा घाइते भएका रामवृक्षको ज्यान गएको धनुषाका प्रहरी प्रमुख एसपी गोविन्द थपलियाले जानकारी दिए । यसैगरी छुरा प्रहारबाटै रामृक्षका २८ वर्षीय छोरा रामसोगारथ यादव गंभीर घाइते भएका छन् । रामसोगारथको जनकपुर अञ्चल अस्पतालमा उपचार सम्भव नभएपछि थप उपचारको लागि बाहिर रेफर गरिएको प्रहरीले जनाएको छ ।
छुरा प्रहार गरेको भन्दै प्रहरीले दुईजनालाई नियन्त्रणमा लिएको छ । पक्राउ पर्नेहरुमा रामवृक्षका भाइ अरुण यादव र भतिज अतिसुन्दर यादव रहेको एसपी थपलियाले बताए । अरुण र अतिसुन्दर बाबुछोरा हुन् । बाबुछोराबीचको विवादका क्रममा छुरा प्रहार भएको प्रहरीले जनाएको छ।
प्रहरीका अनुसार आइतबार अबेर राति दाजुभाइ रामवृक्ष र अरुणबीच विवाद भएको थियो र सोहि क्रममा छुरा चलेको हो । पक्राउ परेका अरुण र अतिसुन्दर विरुद्ध कर्तव्य ज्यान सम्बन्धी मुद्दा चलाइने जिल्ला प्रहरी कार्यालय धनुषाले जनाएको छ ।
