नेपालद्वारा नेदरल्याण्ड्सलाई २१७ रनको चुनौती, पारस र सोमपालको अर्धशतक
नेदरल्याण्ड्सविरुद्धको दोस्रो एकदिवसीय खेलमा नेपालले नेदरल्याण्ड्सलाई जितको लागि २१७ रनको चुनौती दिएको छ ।
टस जितेर पहिले ब्याटिङको निर्णय गरेको नेपालले ४८ ओभर ५ बल खेल्दै सबै विकेट गुमाएर २१६ रन बनाएको हो ।
नेपालका लागि कप्तान पारस खड्का र सोमपाल कामीले अर्धशतकीय पाली खेले । कप्तान पारसले २ छक्का र चार चौकाको सहयोगमा ५१ रन बनाए भने सोमपालले ३ छक्का र ४ चौकाको सहयोगमा ६१ रन बनाए ।
सुवास खबुरेल र दीपेन्द्रसिंह ऐरीले समान १९ रन बनाए भने आरिफ शेष १६ रनमा आउट भए । सन्दीप लामिछाने ८ रन बनाएर आउट हुँदा ललितसिंह भण्डारी ४ रनमा अविजित रहे ।
ज्ञानेन्द्र मल्लले १३ रनको पाली खेल्दा अनिन शाह ४, रोहित पौडेल ६ र बसन्त रेग्मी १ रनमा आउट भए । बलिङतर्फ फ्रेड क्लासेनले तीन विकेट लिए भने पिटर सिलार र माइकल रिपोनले समान २/२ विकेट लिए । सेन स्यानटर र पाउल भान मिकेरेनले १/१ विकेट बाँडे । अबको केही बेरमा नेदरल्याण्ड्सले जवाफी ब्याटिङ सुरु गर्नेछ ।
