पाइलट नै रक्सीले मातेपछि दुवई जाने यात्रु अलपत्र, फ्लाइट क्यान्सिल
पाइलटले नै रक्सी खाएको खुलेपछि आइतबार बिहान दुबईका लागि उड्न तयार फ्लाई दुबईको जहाज काठमाडौंमै रोकिएको छ ।
विमानस्थल प्रमुख राजकुमार क्षेत्रीले एक जना पाइलटको शारीरिक अवस्था अस्वाभाविक देखिएको गुनासो आएपछि उनको मेडिकल गरिएको र त्यसको रिपोर्ट आउन बाँकी रहेको जानकारी दिएका छन् । विमानस्थल प्रशासनले ती पाइलटको ठाउँमा अर्को पाइलट आउनु पर्ने बताएपछि बिहान ९ः४० बजे दुबई उड्नु पर्ने फ्लाइट नम्बर एफजेड ५७६ को जहाज विमानस्थलमै रोकिएको छ ।
फ्लाई दुबईले चालक दलमा अर्को सदस्य आउने बताए पनि उडान कतिबेला हुन्छ भन्ने खुलाएको छैन । जहाज नउडेपछि विमानस्थल पुगेका यात्रुहरू बिहानदेखि कुरिरहेका छन् । जहाजका पाइलटले रक्सी खाएको थाहा पाएपछि चालक दलका अन्य सदस्यले विमानस्थल प्रशासनलाई त्यसको जानकारी गराएका थिए ।
