यस्तो छ सिभिल होम्सको ठगी धन्दा, घर किन्नेको बिजोग, ९ वर्षसम्म लालपूर्जा समेत पाइएन

 

पेशाले कानून व्यवसायी रहेका सरोज प्याकुरेल ललितपुरको सुनाकोठी स्थित सिभिल होम्सको हाउजिङमा बस्छन् ।

अहिलेसम्म कमाएको पैसा र आफन्तबाट ऋणसमेत लिएर सिभिल होम्सको घर किनेका अधिवक्ता प्याकुरेललाई सिभिल होम्सको घर किनेदेखि चैनको निद्रा लागेको छैन ।

 

विभिन्न पत्रपत्रिका र सञ्चारका माध्यममा आकर्षक विज्ञापन दिएर हाउजिङको प्रचार गर्ने सिभिलि होम्सले घर बेचेको ९ वर्षसम्म पनि नामसारी गरेको प्रमाण पत्र उपलब्ध गराउन मानेको छैन ।

अधिवक्ता प्याकुरेल पनि घर किनेदेखि नामसारीको प्रमाण पत्रका लागि धाइरहेका छन् । तर, उनको माग पूरा भएको छैन ।

 

सिभिल होम्सकै लतिलपुरको धापाखेलस्थित हाउजिङमा घर किनेका समेन्द्र बहादुर हमालको दुःख झन ठूलो छ । सवा करोड बढी बुझाएर घर किनेका हमाललाई सिभिल होम्स् प्रालिले न त जग्गाधनी पूर्जा नै दिएको छ न त घर नामसारी नै गरिदिएको छ ।

 

‘लालपूर्जा त दिनुहोस् भनेर धाउन थालेको वर्षदिन भइसक्यो । उनीहरुले भोलि दिन्छौं मात्रै भन्छन्,’ हमालले दुखेसो पोखे, ‘उनीहरुले भन्नेगरेको भोलि अहिलेसम्म पनि आउन सकेको छैन ।’

 

घर–जग्गामा ठगी

अधिवक्ता प्याकुरेलले सुनाकोठीस्थित सिभिल होम्स्को हाउजिङमा ६ आना जग्गा र घरका लागि १ करोड २२ लाख रुपैयाँ बुझाएका थिए । तर, पछि ५ आना ३ पैसा मात्रै जग्गा पाएको अधिवक्ता प्याकुरेलले बताए ।

‘सिभिल होम्सले जग्गा खरिद गर्नुअगाडि कवूल गरेको जग्गा खरिद गरिसकेपछि दिँदैन,’ अधिवक्ता प्याकुरेलले भने, ‘घर–जग्गा खरिद गर्ने सबै ग्राहकलाई उसले कवूल गरेको जग्गामा १ देखि ३ पैसासम्म क्षेत्रफल घटाएर दिन्छ । यो त सिधै ठगी हो नि !’

 

आफन्तबाट ऋण लिएर घर किनेकाहरु नयाँ घर धितो राखेर बैंकबाट पैसा निकालेर आफन्तबाट लिएको ऋण तिर्न चाहन्छन् । तर सिभिल होम्सले घर निर्माण सम्पन्न भएको, घरको नक्सा पास भएको तथा घर हस्तान्तरण गरेको प्रमाण पत्र नदिँदा सिभिल होम्सको हाउजिङमा बसेकाहरु थप समस्या परेका छन् ।

 

‘म आफैं पनि घर बैंकमा राखेर ऋण निकाल्न चाहन्थे,’ अधिवक्ता प्याकुरेलले भने, ‘तर निर्माण सम्पन्न भएको प्रमाण पत्र र घरको नक्सा नहुँदा बैंकले ऋण दिन मानेको छैन । सिभिल होम्स प्रालिलाई यसबारे गुनासो गर्दा उनीहरुले कुनै पहल गरेका छैनन् ।’

सिभिल होम्सको हाउजिङमा घर किनेका अधिकांश साझा गुनासो छ, भनेजस्तो कुनै पनि सुविधा नपाएको  । कतिपय घरमा त वर्षात् शुरु भएपछि घरको छाना चुहिने समस्या पनि छ ।

 

मापदण्ड मिचेर घर निर्माण 

 

२०६२ सालदेखि निर्माण सुरु गरिएको सुनाकोठीस्थित सिभिल होम्स तेस्रो फेजमा काठमाडौं उपत्यका विकास प्राधिकरणले १९१ निर्माण गर्ने अनुमति दिएको थियो । तर, कम्पनीले त्यहाँ १९६ घर बनाएको छ । ती घरहरु सरकारी मापदण्ड मिचेर बनाइएका हुन् ।

 

सिभिल होम्सले आफ्नो तेस्रो फेज अन्तर्गत सुनाकोठीमा ६ लाख ८६ हजार ९ सय ७२ दशमलव ३८ बर्गफिट क्षेत्रफलमा सिभिल हाउजिङ निर्माणको अनुमति पाएको थियो । जसमध्ये ४ लाख ८२ हजार ५ सय २७ दशमलव ७१ बर्गफिटमा घर, १ लाख ३१ हजार ८ सय ७२ दशमलव २५ बर्गफिटमा सडक तथा फुटपाथ, २९ हजार ६ सय ६१ दशमलव २५ बर्गफिटमा हरियाली क्षेत्र, १ हजार ९ सय ७९ दशमलव ६८ बर्गफिटमा पार्किङ, २ हजार ९ सय बर्गफिटमा विद्यालय, १८ हजार ४ सय ८४ बर्गफिटमा क्लब हाउस र १९ हजार ५ सय ४७ वर्गफिटमा गोरेटो बाटो बनाउन अनुमति प्रदान गरिएको थियो । तर, कम्पनीले हरियाली क्षेत्र, गोरेटो बाटो, विद्यालय र पार्क बनाउनु पर्ने जग्गा मासेर घर निर्माण गरी बिक्री गरेको छ ।

 

हाउजिङ क्षेत्रभित्र निर्माण गर्नु पर्ने विद्यालयको भवन नै निर्माण गरिएन । निर्माण सम्पन्न भएर सबै घर बिक्री भइसकेपछि कम्पनीले त्यहाँ बस्ने उपभोक्ताको समुदायलाई बस्ती हस्तान्तरण गर्नु पर्ने हो । तर, कम्पनीले त्यहाँको बाटो, पार्क र हरियाली क्षेत्रको जग्गा आफ्नो भन्दै बस्ती बाहिरका व्यक्तिलाई बिक्री गरिरहेको छ ।

 

सिभिल होम्सले सुनाकोठीमा घर निर्माण गर्नुअघि स्विमिङ पुल, सामूदायिक भवन लगायतका संरचना निर्माण गरेर त्यहाँ घर किनेर घरधनीलाई सामूहिक रुपमा दिने बताएको थियो । तर अहिले स्विमिङ पुलको ठेक्का बाहिरका व्यक्तिलाई दिइएको छ ।

अधिवक्ता सरोज प्याकुरेल सिभिल होम्सले कानून मिचेर घर निर्माण गरी बिक्री गरिरहेको बताए । संयुक्त आवासको स्वामित्व सम्बन्धी ऐन, २०५४ मा आवास इकाइ धनीहरुको हित विपरित हुने गरि कार्य गर्न नहुुने उल्लेख गरिएको भएपनि सिभिल होम्सले त्यसको पालना नगरेको प्याकुरेलको दावी छ ।

यस विषयमा बुझ्न खोज्दा सिभिल होम्स प्रालिका प्रतिनिधिहरु सम्पर्कमा आउन चाहेनन् ।