टिपरको ठक्करको विरोधमा वीपी राजमार्ग बन्द, मुख्यमन्त्री डोरमणि पौडेल पनि रोकिए

 

 

काभ्रेपलाञ्चोकको बनेपा नगरपालिका–७ स्थित चारदोबाटो चोकमा टिपरले मोटरसाइकललाई ठक्कर दिँदा मोटरसाइकल चालकको मृत्यु भएको छ ।  मोटरसाइकल चालकको मृत्यु भएको विरोधमा स्थानीय वासिन्दाले वीपी राजमार्गको भकुण्डे खण्ड बन्द गराएका छन् ।

 

बनेपाको चारदोबाटोमा टिपरको ठक्करबाट मोटरसाइकल चालक नमोवुद्ध नगरपालिका-४, खनालथोकका ४८ वर्षीय जीतबहादुर तामाङको मृत्यु भएपछि स्थानीय वासिन्दाले काभ्रको धुलीखेलदेखि भकुण्डेसम्मको सडक बन्द गराएका हुन् ।

 

राजमार्ग बन्द हुँदा वीपी राजमार्ग हुँदै काठमाडौंतर्फ आइरहेका गाडीहरु भकुण्डेमा रोकिएको छ । सडक खुलाउन प्रयास भइरहेको काभ्रेका प्रहरी नायब उपरीक्षक महेन्द्रप्रसाद मरासिनीले जानकारी दिए ।

 

वीपी राजमार्ग बन्द हुँदा प्रदेश ३ का मुख्यमन्त्री डोरमणि पौडेल पनि रोकिएका छन् । सिन्धुलीमा कार्यक्रममा सहभागी भएर फर्किने क्रममा उनी मंगलटारमा रोकिएका हुन् । उनी इलाका प्रहरी कार्यालय मंगलटारमा बसेका छन् ।

 

बनेपाबाट धुलिखेलतर्फ गइरहेको टिपरले एउटै दिशातर्फ गइरहेको मोटरसाइकललाई ठक्कर दिदाँ मोटरसाइकल चालक घाइते भई उपचारका क्रममा बनेपास्थित शिर मेमोरियल अस्पतालमा मृत्यु भएको जिल्ला प्रहरी कार्यालय काभ्रेपलाञ्चोकले जनाएको छ ।

 

दुर्घटनापछि बनेपा बजार तनाव ग्रस्त बन्यो । बा २ क ३९३४ नम्बरको टिपरले एउटै दिशामा रहेको बा ८३ प ५०७७ नम्बरको मोटरसाइकललाई ठक्कर दिएको र मोटरसाईकलमा सवार नमोबुद्ध नगरपालिका खनालचोकका ५७ वर्षीय जितबहादुर तामाङको मृत्यु भएको प्रहरीले जनाएको छ ।

 

घटना भएलगत्तै आक्रोशित भीडले टिपरमा आगो लगो लगाईदिए । आक्रोशित त्यही भीडले चारदोबाटो चोकमा रहेको प्रहरी बिटमा समेत तोडफोड गरेको छ ।  प्रहरीले दमकलको सहायताले टिपरमा लागेको आगो निभाएको थियो ।

 

प्रहरीले टिपर, त्यसका चालक नुवाकोट विदुर नगरपालिका–१ बस्ने २९ वर्षीय सुधन श्रेष्ठसहित  मोटरसाइकल नियन्त्रणमा लिएको छ । टिपरले मोटरसाईकल र स्कुटरलाई ठक्कर दिएका घटना लगातार घट्न थालेपछि काठमाडौं उपत्यकामा दिउँसो टिपर चलाउन रोक लगाईएको छ ।

 

अहिले बेलुका ८ बजे पछि मात्रै टिपर चलाउन भनिएको छ । उपत्यकाको टिपर आतंक काभ्रे पुगेकोमा स्थानीयहरु आक्रोशित भएका छन् ।