नेप्सेमा लफडा, अध्यक्षले सीइओ साउदलाई हाजिर हुन रोके, सेयर कारोबार ठप्प

नेपाल स्टक एक्सचेन्जमा लफडा सुरु भएको छ । सर्वोच्च अदालतबाट अन्तरिम आदेश पाएर काममा फर्किएका प्रमुख कार्यकारी अधिकृत चन्द्रसिंह साउदलाई हाजिर हुनबाट नेप्से सञ्चालक समिति अध्यक्ष लक्ष्मण न्यौपानेले रोकेका  छन् । उनले साउदलाई हाजिर गर्न दिएका छैनन् । अन्य कर्मचारीलाई पनि अध्यक्ष न्यौपानेले हप्कीदप्की गरिरहेका छन् ।

 

यसैगरी नेप्से साइटमा प्राविधिक समस्या उत्पन्न भएको छ । यो समस्या समाधान गर्न काम गरिरहेका नेप्सेका आइटी प्रमुख निरञ्जन सिंह नायकलाई पनि अध्यक्ष न्यौपानेले हप्कीदप्की गरेका छन् । जसका कारण सेयर कारोबार हुनै सकेको छैन । उता, साउदलाई हटाएर अर्थ मन्त्रालयबाट सीइओको जिम्मेवारी पाएका रमेश अर्याल पनि नेप्सेमै हाजिर भएका छन् ।

 

अर्थ मन्त्रालयको आदेशमा अर्याल मन नपरीनपरी  पनि नेप्सेमा आउन बाध्य भएको स्रोतले जानकारी गराएको छ । अर्यालले भने काममा अवरोध गरेका छैनन् ।

 

सरकारको चरम लापरवाहीका कारण ११ बजेर ४० मिनेट जाँदासम्म पनि सेयर कारोबार हुन सकेको छैन । यसबाट लगानीकर्ता मारमा परेका छन् । अनलाइन प्रणाली आउन लागेका बेला सेयर कारोबार नै रोकिनुलाई लगानीकर्ताले दूर्भाग्यपूर्ण भनेका छन् ।

 केही बेर कारोबार भए पनि फेरि रोकिएको छ । एकै छिन कारोबार खुल्ने फेरि बन्द हुने गरेको ब्रोकरहरुले जानकारी गराएका छन् । यो समाचार तयार पार्दासम्म करिब ५२ लाख रुपैयाँ जतिको मात्र कारोबार भएको छ । तर सिस्टम खुल्ने र बन्द हुने क्रम जारी छ ।