सांसदले हानेको झापड काण्ड सिंहदरवार पुग्यो, अनि भयो यस्तो लफडा
प्रदेश २ मा सांसदले सांसदलाई नै हानेको झापड काण्ड विवाद सिंहदरवारसम्म पुगको छ ।
जेठ २२ गते एक विवादपछि नेपाल कम्युनिष्ट पार्टी (नेकपा) की सांसद मञ्जु यादवले सो दलका अर्का सांसद किशोरी साहलाई झापड हानेकी थिइन् ।
सो विवाद नेकपाको केन्द्रीय समितिको बैठकदेखि स्थायी समितिको बैठकसम्म पुगेको थियो । तर, त्यसको कही सुनुवाई नभएपछि किशोरी साह पक्षले शुक्रबार प्रधानमन्त्री केपी शर्मा ओलीलाई भेटेर कारवाहीको माग गरेको हो ।
साह पक्षले सांसद यादवमाथि कारवाहीको माग गर्दै आएका छन् । सांसद यादवलाई पार्टी तथा प्रदेश सभा सदस्यबाट हटाउनुपर्ने उनीहरुको माग गरेको छ ।
पार्टीका स्थायी समिति सदस्य एवंं प्रदेश २ का संसदीय दलका नेता सत्यनारायण मण्डल पनि यस घटनामा मुछिएका छन् ।
यता मञ्जु यादवले भने सत्यनारायण मण्डलको उक्साहटमा किशोरी साहले आफूलाई अपशब्द प्रयोग गरेको आरोप लगाउँदै आएकी छन् ।
त्यस विषयलाई लिएर सत्यनाराण र मञ्जुबीच पनि भनाभन भएको थियो । सत्यनारायण मण्डलले मञ्जुलाई कारवाही गर्नुपर्ने केन्द्रसम्म दवाव दिएको एक नेताले जानकारी दिए ।
स्रोत भन्छ, ‘मञ्जु र किशोरी बीचको झगडा सत्यनारायण मण्डलले आफ्नो टाउकोमा लिएका छन् । किशोरीले मतलब नराखे पनि मण्डलले केन्द्रसम्म यस विषयलाई उचालेका छन् । यहाँसम्म कि मञ्जुलाई कारवाही नभए आफूले नै पार्टी छाड्नेसम्मको चेतावनी दिएका छन् ।’
मञ्जुलाई कारवाही गर्नुपर्ने भन्दै प्रदेश सभाका सांसदहरुको हस्ताक्षर समेत संकलन गरिएको बताइएको छ । संकलित हस्ताक्षरसहितको एउटा ज्ञापनपत्र पनि प्रधानमन्त्री अोलीलाई दिइने स्रोतले जनाएको छ ।
यसविषयमा किशोरीलाई रातोपाटीले सम्पर्क गर्दा मञ्जु यादवलाई कारवाही हुने कुरामा आफू विश्वस्त रहेको तर कहिले हुन्छ भन्न नसकिने प्रतिकृया दिए ।
प्रकाशित मिति : २३ असार २०७५, शनिबार १२ : १४ बजे
