आगामी महाधिवेशमा निधीलाई सभापति बनाउँने देउवाको तयारी,रामचन्द्र हुने भए आउट



मनोनीत भएको दुई महिनापछि नेपाली कांग्रेसका उपसभापति विमलेन्द्र निधीले शुक्रबार पार्टी केन्द्रीय कार्यालय सानेपामा औपचारिक रूपमा काम सम्हालेका छन् । रोपाइँ दिवस पारेर १५ असारको शुभसाइतमा पदभार ग्रहण गरेको निधीको भनाइ छ ।

महाधिवेशन सम्पन्न भएको दुई वर्षपछि उपसभापति मनोनीत भएका निधीले दुई महिनापछि मात्रै कार्यभार सम्हाल्नु संयोग मात्रै होइन ।

उनी उपसभापति मनोनीत हुनुअघि र मनोनीत भएपछि कांग्रेसको आन्तरिक समीकरणमा फेरबदलसमेत देखिएको छ । पदभार ग्रहणपछि आयोजित सम्बोधनमा निधीको दायाँतर्फ केन्द्रीय सदस्यद्वय उमाकान्त चौधरी र शिव हुमागाईं थिए । उनीहरू दुवै जना कृष्णप्रसाद सिटौलाको कोटामा मनोनीत भएका हुन् ।

यसैगरी, बायाँतर्फ बालकृष्ण खाण, डिना उपाध्याय र राधेचन्द्र यादव थिए । ०५९ सालमा पार्टी विभाजन भएको तेस्रो दिन सिंगो नेपाल तरुण दललाई नेपाली कांग्रेसबाट छुटाएर कांग्रेस (प्रजातान्त्रिक) मा समाहित गर्ने नेता हुन् बालकृष्ण खाण । चार वर्ष नेविसंघ र १० वर्ष नेपाल तरुण दलको नेतृत्व गरेका खाण ०५४ सालदेखि लगातार कांग्रेसको केन्द्रीय समितिमा छन् ।

निधी उपसभापति मनोनीत भएपछि कांग्रेसको पहिलो ठूलो कार्यक्रम जिल्ला सभापतिहरूको हेटौँडा भेला हो । जिल्ला सभापतिहरूको भेलामा संस्थापन पक्ष, खासगरी पार्टी सभापति शेरबहादुर देउवाको चर्को आलोचना हुने र निर्वाचनमा भएको पराजयको जिम्मेवार देउवालाई नै ठहर गर्ने सम्भावना थियो । ७७ मध्ये ३४ जिल्ला सभापति मात्रै संस्थापन पक्षमा थिए । तर, उक्त भेला निर्विवाद रूपमा टुंगियो ।

वरिष्ठ नेता रामचन्द्र पौडेल स्वयंले उक्त भेलाको समापन समारोहमा बोल्दै देउवालाई साथ दिने प्रतिबद्धता व्याक्त गरे । यो वातावरण उपसभापति निधीले नै बनाएका थिए ।

यस क्रममा निधीले वरिष्ठ नेता पौडेलसँग विभिन्न चरणमा संवाद अघि बढाएका थिए । देउवा र पौडेल मिलेको सन्देश दिँदै हेटौँडा भेला सम्पन्न भएको थियो । अब कांग्रेसभित्र आन्तरिक प्रतिपक्षको भूमिका सिटौला समूहले निर्वाह गर्ने आकलन गरिएको थियो ।

तर, निधीको पदभार ग्रहणमा सिटौला समूहका केन्द्रीय सदस्यहरूको समेत उपस्थिति रह्यो । कांग्रेसभित्रका सबै समूहले निधीलाई सहज रूपमा लिएको पौडेल पक्षका एक केन्द्रीय सदस्यले बताएको आजको सौर्य दैनिकमा समाचार छ ।

विगतमा कोइराला समूहको हस्तीका रूपमा रहेका देउवालाई कृष्णप्रसाद भट्टराई समूहमा पुर्याएर सभापति पदसम्मको हैसियत दिलाउने श्रेय पनि निधीलाई नै जान्छ भन्ने बुझाइ कांग्रेसको आम कार्यकर्तापंक्तिमा छ ।

देउवापछि लगत्तै नेविसंघको सभापति बनेका निधी बिपी कोइरालाको निधनपछि सन्त नेता भट्टराईको निकट रहँदै आएका थिए । तर, भट्टराई समूह कमजोर रहेपछि निधीले नै देउवा र खुमबहादुर खड्कालाई भट्टराई समूहमा पु¥याएर आँफू उनीहरूभन्दा लो प्रोफाइलमा बसे ।

नेपाली कांग्रेसको नेतृत्व कोइराला परिवारबाट बाहिर ल्याउन सफलता प्राप्त गरेकै कारण निधीलाई नेपाली कांग्रेसभित्रको चाणक्य भन्ने गरिन्छ ।

तर, देउवा पार्टी सभापति बनेपछि उपसभापति मनोनीत हुन निधीलाई २ वर्ष २ महिना पर्खनुप¥यो । प्रचण्ड नेतृत्वको सरकारमा उपप्रधानमन्त्री हुँदा तीन वटा प्रकरणमा निधीले सभापति देउवासँग फरक मत राखे । पहिलो प्रकरण थियो, ‘आइजिपी काण्ड’ ।

निधी नवराज सिलवाललाई आइजिपी बनाउन चाहन्थे भने सभापति देउवा जयबहादुर चन्दलाई । जसका कारण करिब दुई महिना कुनै निर्णय हुन सकेन ।

अन्तिममा निधीले देउवासँग सम्झौता गरे । चन्द आइजिपी बने । तर, यो निर्णय सर्वोच्च अदालतले उल्ट्याइदियो । यो निर्णय उल्ट्याएबापत माओवादीको सहयोगमा देउवाले प्रधानन्यायधीश सुशीला कार्कीविरुद्ध महाअभियोगको प्रस्ताव दर्ज गराए । यो काण्डपछि निधीले उपप्रधानमन्त्री पदबाट राजीनामा दिए ।

महाअधियोग फिर्ता लिएर देउवाले निधीसँग सम्झौता गरे । तेस्रो प्रकरण थियो, ‘कमल थापालाई उपप्रधानमन्त्री बनाइएको काण्ड’ । यो काण्डपछि पनि निधीले पदबाट राजीनामा दिएका थिए, तर देउवासँगको सम्झौतापछि उनले राजीनामा फिर्ता लिए ।

यी तीन काण्डपछि देउवाले निधीलाई उपसभापति मनोनयन नगर्ने अनुमान धेरैले गरेका थिए । तर, देउवाले निधीजत्तिको काबिल सहयोगी गुमाउन चाहेनन् ।

निधी उपसभापति बन्नासाथ कांग्रेसभित्रको गुटगत दुरी घट्नुलाई संयोग मात्रै मानिएको छैन । तर, कुन सहमतिका साथ देउवाले निधीलाई उपसभापति मनोनयन गरेका हुन्, र निधीले औपचारिक रूपमा कार्य प्रारम्भ गर्न किन ढिलाइ गरेका हुन् भन्ने रहस्य अझै अन्योलमा छ ।

१४औँ महाधिवेशनमा देउवा पक्षबाट सभापतिको उम्मेदवार निधी हुन सक्ने अनुमान १३औँ महाधिवेशनको पूर्वसन्ध्यामै गरिएको थियो ।

तर, निधीलाई उपसभापति बनाउन ढिलाइ गरिएपछि १४औँ महाधिवेशनमा पनि देउवा आफैँ सभापतिको उम्मेदवार बन्ने रणनीतिमा छन् कि भन्ने अनुमान लगाउन थालिएको छ ।

तर, यो अनुमानले आकार ग्रहण गरिसकेको छैन । शुक्रबार पदभार ग्रहण कार्यक्रममा निधीले जे अभिव्यक्ति दिए, त्यसलाई विश्लेषण गर्नेहरू भने अब देउवा र निधीबीच कुनै तिक्तता बाँकी नरहेको बताउँछन् ।

तर, हेटौँडा भेलाको सभापनमा देउवाले १५ मिनेट बोल्दा करिब १२ मिनेट जति आइजिपी प्रकरणमै समय खर्च गरेका थिए । आइजिपी प्रकरणमा म ठीक थिएँ भनेर देउवाले भन्नुको अर्थ हो, निधी गलत थिए । तर, आफैँले उपसभापति बनाएको नेतालाई गलत थिए भन्नुमा कुनै दम भने देखिँदैन ।

प्रतिक्रिया दिनुहोस
मेयरविरुद्धको मुद्दाले राप्तीको नगरसभा अनिश्चित

    जनप्रतिनिधिहरूबीचको बेमेलका कारण चितवनको राप्ती नगरपालिकाको नगरसभा यसवर्ष पनि अनिश्चित भएको

बाराको जीतपुर सिमरा उपमहानगरको नगर सभामा झडप

    बाराको जीतपुर सिमरा उपमहानगरपालिकाको नगरसभाको वैठकमा झडप भएको छ । नीति

कानुन मन्त्री र संसदका कर्मचारीबीच वार्ता

    कानुन न्याय तथा संसदीय मामिला मन्त्री पदम गिरी र संघीय संसद

सहकारी पीडितको काठमाडौंमा प्रदर्शन

    सहकारी संस्थाका पीडितहरुले काठमाडौंमा प्रदर्शन गरेका छन् । सहकारी बचतकर्ता संरक्षण