लगातार बढेको गर्मीले तराइको जनजीवनमा प्रभाव
लगातार बढ्दै गएको गर्मीका कारण कैलाली कञ्चनपुर लगायत तराईका जिल्लामा जनजीवन नराम्रोसँग प्रभावित हुन थालेको छ ।
बढ्दै गएको गर्मी र सुक्खा मौसमका कारण बालबालिका, वृद्धवृद्धा र मजदूर वर्गमा थप समस्या भएको छ ।
गर्मी बढेसँगै श्वासप्रश्वासको समस्या, ज्वरो आउने, टाउको दुख्ने, वाकवाकी लाग्नेजस्ता बिरामीको चाप स्वास्थ्य संस्थामा बढेको स्वास्थ्यकर्मीले बताएका छन् । गर्मी बढ्दै जाँदा सर्वसाधारण घर बाहिर निस्कन सकिरहेका छैनन् ।
गर्मी बढ्दै जाँदा कतिपय व्यक्ति गर्मी छल्नकै लागि चिसो मौसम रहने ठाउँ खोज्दै हिड्न थालेका छन् ।
वर्षा नभएको र गर्मी बढ्दै जाँदा आकाशको पानीको भरमा धान रोपाइँ गर्ने तयारीमा रहेका कृषकले पानीको अभावमा रोपाइँ गर्न सकेका छैनन् ।
बोरिङको पानी तानेर गरिएको रोपाइँ पानीको अभावमा सुक्न थालेको छ भने खेतबारीमा राखिएको धानको ब्याड सुकेर जान थालेको स्थानीय कृषकहरुले गुनासोगरेका छन् ।
तराइका अधिकांश क्षेत्रमा मनसुन अझैसम्म सक्रिय हुन सकेको छैन । तराई क्षेत्रमा अधिकतम तापक्रम ४० डिग्री सेल्सियस भन्दा माथि तापक्रम बढ्ने गरेको छ ।
