वडाध्यक्षले सडकमै देखाए ताण्डप, खुकुरी हान्दा चार घाइते
रौतहटको बौधिमाई–७ का वडाध्यक्ष विजय कुसवाहले सडक विस्तारका क्रममा विवाद हुदा स्थानीय चार जनामाथि खुकुरी प्रहार गरेका छन् ।
सडक विस्तारका लागि स्थानीय बासिन्दाको जग्गामा जबर्जस्ती डोजर चलाएपछि विवाद भएको थियो । विपक्षी पार्टीका समर्थकहरूको जग्गामा वडाध्यक्ष कुसवाहले जबर्जस्ती डोजर चलाएको स्थानीयवासीको आरोप छ ।
वडाध्यक्षसहितका ५० जनाको समूहले स्थानीय शिवगोविन्द कुसवाह, महानन्द कुसवाह, रामेश्वर कुशवाहालगायतलाई धारिलो हतियार प्रहार गरेको हो । वडाध्यक्ष कुसवाह तत्कालीन एमालेबाट निर्वाचित भएका हुन् ।
घटनाबारे छानविन भइरहेको जिल्ला प्रहरी प्रमुख एसपी रविन्द्र केसीले बताए । जग्गाधनी गोविन्द कुसवाहले एक महिनाअघि जिल्ला प्रशासन र अदालतमा आफ्नो जग्गामा सडक निर्माण रोक्न माग गर्दै निवेदन दिएका थिए । अदालत र प्रशासनको आदेश बेवास्ता गर्दै वडाध्यक्षले जबर्जस्ती बाटो विस्तार गर्दै आएका छन् ।
