अपहरण, अवैध जुवा, डनगिरी चलाँउदै आएका अशोक लामा पक्रिएपछि चितुवाहरु दुला पसे

काठमाडौं । राजधानीको युएनपार्कमा गोली चल्नुका साथै गुण्डा नाइके विष्णु लामा घाइते भएपछि ललितपुरक्षेत्रमा डनगिरी मच्चाउँदै आएका उनका साथीहरु दुला पसेका छन् । केही दिन अघि गुण्डा नाइके अशोक लामामाथि प्रहरीले काठमाडौंको युएन पार्कमा गोली प्रहार गरेको थियो ।

महानगरीय अपराध महाशाखाबाट रेगुलर सर्च अप्रेशनमा खटिएको प्रहरी टोलीमाथी आक्रमण प्रयास गरेपछि लामामाथि गोली प्रहार गरिएको प्रहरीको भनाई छ । अपराध महाशाखाका प्रमुख एसएसपी धिरज प्रताप सिंहले यो पक्राउपछि अनय गुण्डाहरुको नेक्सस पत्ता लागाउन आफुहरुलाई सहयोग पुगिरहेको बताएका छन् ।

सातदोबाटोलाई आधार मानेर गुण्डागर्दी गर्दै आएका लामाको साथबाट एक थान पेस्तोले र दुई राउण्ड गोली प्रहरीले बरामद गरेको छ । उनको दायाँ खुट्टाको माथिल्लो भागमा एक राउण्ड गोली लागेको थियो । उनलाई प्रहरीले उपचार समेत गर्दै कानुनी कारवाही अघि बढाएको बताइएको छ ।

को हुन अशोक लामा

लामो समयदेखि ललितपुर सातदोबाटो क्षेत्रलाई आधार मानेर डनगिरी चलाँउदै आएका विष्णु लामा पहिले काभ्रेली डन गणेश लामाकौ समुहमा थिए । पछि त्यहाँबाट फुटेर अलग्गै ग्या जम्मा गरेर अघि बढेका उनी पछिल्लो समय प्रहरीको खोजी सुचीमा थिए ।

डन दावा लामाको खास सहयोगीको भुमिकामा रहँदै आएका अशोक सुरुमा गणेश लामाका फाइटरका रुपमा डनगिरी क्षेत्रमा प्रवेश गरेको बताइन्छ । विष्णु लामा, तिर्थ लामा, पञ्चे लामा, वुद्धि लामा जस्तै उनले पनि अलग्गै डनगिरी गर्दै आएका छन् ।

पछिल्लो समय मकवानपुर सिस्नेरी स्थायी ठेगाना भएका बुद्धि लामा भनेर चिनीने बुद्धिराम डिम्डङु र अशोकको हिमचिम व्यापक थियो । आफुलाई चितुवा भनेर समेत चिनाउँदै आएका बुद्धि लामासंग धेरै लामो समयदेखि अशोकको व्यापारिक साझेदारी रहँदै आएको खुलेको छ ।

बुद्धि र अशोक दुबै मिटरव्याजी भएको बताइन्छ । उनीहरुले श्रृृण प्रवाह गर्दा गाडी तथा घर जग्गा धितो राख्ने र व्याज बढाँउदै लगेर सम्पती नै हडप्ने काम गर्दै आएका पिडितहरु बताउँछन् ।
लामो समयदेखि गुण्डागर्दीमा संलग्न अशोक विभिन्न व्यक्तिको हत्या प्रयासको अभियोगमा खोजीको सुचिमा रहेका थिए ।

अशोक पक्रिनासाथ चितुवा भुमिगत

अशोक लामा प्रहरीको नियन्त्रणमा आउनासाथ उनका साझेदार मकवानपुर सिस्नेरीका चितुवा भुमिगत भएका छन् । प्रहरीले अध्ययन अनुसन्धानका क्रममा साझेदारी व्यवसाय खुल्ने र आफु पनि परिने डरले उनी भुमिगत भएको बताइएको छ । बुद्धि अर्थात चितुवाको अशोक भन्दा पहिले चाँही विष्णु लामासंग साझेदारी थियो । पछिल्लो समय चितुवाले अशोक लामासंग साझेदारी गर्दै आएका थिए ।

चितुवा आफु धेरै ठाँउमा नहिँड्ने र फिरौती संकलनका लागि भाई जयरामलाई अघि सार्ने गरेको खुलेको छ । ललितपुर क्षेत्रमै ३ वटा घर भएपनि चितुवा अहिले नखिपोट क्षेत्रमा भाडामा बस्दै आएका थिए । तर अशोक लामालाई पक्रिएपछि कोठामा पनि नबस्ने र आफ्नो सुचना पनि कसैलाई नदिने गर्न थालेको बताइन्छ । उनी यता बलि बढी नै प्रहरीले खोज्न थालेपछि दुबइ, थाइल्याण्ड लगायतका देशमा जाने गरेका छन् ।

अपहरण गरेर कवाडी व्यवसायीसंग ३५ लाख

चितुवाको ग्याङले केही वर्ष अगाडि महालक्ष्मीस्थानका मिश्र थरका कवाडी व्यवसायीसंग ३५ लाख रुपैंया बुझेको पत्ता लागेको छ ।
मिश्र थरका ति व्यवसायीलाई विभिन्न स्थानमा लगेर अपहरण गरेर ३५ लाख रुपैंया पाएपछि मात्र अपहरणमुक्त गरेका थिए । तर प्रहरीमा उजुरी गरे नेपाल बस्न नदिने धम्की दिएका कारण उनले कहिँ कतै उजुरी गरेनन् ।

सिस्नेरीको क्रसरबाट १० प्रतिशत

इन्द्रशरोवर गाँउपालिकामा पर्ने मच्छेनारायण रोडा ढुङ्गा उद्योग अहिले सिस्नेरीमा निर्वाध ढंगले चलिरहेको छ । सो कारण त्यस क्षेत्रमा वातावरण विनास भइरहेको बताइन्छ ।तर कसैले अवरोध र विरोध गर्न सकेका छैनन् । राजनीतिक तहका नेतृत्वले २५ प्रतिशत र डनहरुले १० प्रतिशत शेयर लिएकाले अहिले सबैको सहमतिमा सिस्नेरीमा निर्वाध रुपमा ढुङ्गाखानी चलाइरहेको बताइन्छ । त्यसको सञ्चालक काठमाडौं हाँडीगाँउका वीरध्वज थापा हुन् । उनलाई तत्कालिन गाविस अध्यक्ष सुभाष ठकुरीले सिस्नेरी भित्र्याएका थिए ।

बालकुमारीको जग्गा साझेदारीमा हडपियो

अशोक लामा र बुद्ध लामाले ललितपुरको वालकुमारीमा रहेको ४ रोपनी जग्गा हडपेका छन् । सो जग्गा उनीहरु दुबैजनाको संयुक्त नाममा पास गरिएको थियो । त्यो बेला थर्काएर आनाको २ लाख रुपैंयामा खरीद गरिएको सो जग्गा अहिले आनाको ४० लाख मुल्य पर्ने भएको छ । पछिल्लो पटक अशोक पक्राउ परेपछि लगनखेलतिरको ग्याङ नै सक्रिय हुन नसकेको थाहा भएको छ ।

देखावटी व्यावसाय निर्माण कम्पनी

काम डनगिरी भएपनि अहिले बुद्धको समुुहले आफुलाई ठेकेदा भनेर प्रस्तुत गर्ने गरेका छन् । एउटा साधारण कन्ट्रक्सन कम्पनी दर्ता गरिएको छ । हरेक स्थानमा ठेक्का हाल्न पुगेपनि अधिकांश स्थानमा काम गर्ने उद्देश्यले नभइ प्रतिशत रकमका लागि टेन्डर हाल्ने गरिएको बताइन्छ । ठेक्का परि हालेपनि सो कम्पनीले अहिलेसम्म आफैंले कुनै एउटा काम गरेको छैन । पेटीमा अरुलाई दिने गरेको बताइन्छ ।

खोजीको सुचिमा अन्य पनि

यही ग्याङ मातहत अन्य थुप्रै केटाहरु पनि जर्वजस्ती असुली, चन्दा आतंक तथा फिरौतीमा संलग्न भएको थाहा भएको छ । लगनखेल एरीयालाई मुख्य टार्गेट गरेर अघि बढेको सो ग्याङमा माइला लामा, साइला लामा, गोपाल लामा, शरण लामा लगायत छन् । यसलाई लामाज् ग्याङ समेत भन्ने गरिएको छ । माइला र साइलाले केही वर्ष अघि एक मेनपावर सञ्चालकलाई अपहरण गरी कुसुन्तीको युनीभर्षल क्याफेमा राखेर पाँच लाख रकम लिएको बताइन्छ ।

चितुवाको हुलिया परिवर्तन

पहिले पाँच रुपैंया चुरोट खान पनि पैसा नभएर माग्दै हिड्ने चितुवा अहिले खतराको कार चढ्ने गर्छन् । सुरुमा जोगीले जस्तो लामो लट्टा पालेका उनले केही वर्ष यता कपाल काटेका छन् । बेला बेला हुलीया परिवर्तन गरेर हिँड्दा उनीहरुलाई प्रहरीको आखा छल्न सजिलो हुने गरेको प्रहरी स्रोत बताउँछ ।

३ स्थानमा अवैध जुवा

सो ग्याङले सिङ्गो घर नै भाडामा लिएर विभिन्न ठाँउमा अवैध जुवा खेलाउने गरेको छ । ठुलो रकमको म्यारीज र कौडा समेत दिनहुँ लाखौंको कारोवार हुने गरेको छ । ललितपुर ढोलाहिटी, सात दोवाटो लगायतको स्थानमा ५ ठाँउमा त प्रहरीकै सेटीङमा जुवा खाल चलाइरहेको बताइएको छ ।