काठमाडाैं ल्याएर जेल भित्रको अर्को जेल सुन्धाराको गोलघरमा सुन तस्कर गोरेलाई यसरी जाकियो
तीन हजार ८ सय किलो सुन तस्करी र सनम शाक्य हत्याका मुख्य आरोपी चुडामणि उप्रेतीलाई केन्द्रीय कारागार सुन्धाराको भित्री भागमा रहेको गोलघर चलान गरिएकाे छ।
सम्पत्ति शुद्धीकरण अनुसन्धान विभागको पत्रले थप अनुसन्धानका लागि सोमबार काठमाडौं ल्याइएका गोरेको सुरक्षालाई ध्यानमा राख्दै गोलघर चलान गरिएकाे हाे।
मोरङ जिल्ला अदालतको आदेशले पूर्पक्षका लागि मोरङ जिल्ला कारागारमा रहेका उनलाई काठमाडौं ल्याइए लगत्तै गोलघर पठाइएकाे हाे। कारागार स्रोतका अनुसार गृहमन्त्रालयको निर्देशनमा उनको सुरक्षाका लागि गोलघर छानिएकाे हाे।
गोलघरमा रहेको एउटा कोठामा गोरेलाई राखिनेछ। कारागारभित्रको पनि कारगार मानिने गोलघरमा विशेष सुरक्षा र अन्य कैदीबन्दीको सम्पर्कभन्दा बाहिर हुने गर्छ।
‘सोमबार सुनसरी र मोरङबाट ल्याईएका तीनजना बन्दीलाई अलग–अलग स्थानमा राखिएको छ। एकजनालाई विशेष सुरक्षा दिने भन्ने निर्देशन छ,’ कारागार स्रोतले भन्यो।
केन्द्रीय कारागारका सहायक जेलर श्रवणप्रसाद साहले सोमबार गोरेसहित भुजुङ गुरुङ र डाक्टर डेविट भन्ने छिरिङ वाङगेल घले (गुरुङ) लाई ल्याइएको छ। तीनै जनालाई अलग–अलग स्थानमा राखिने उनले जानकारी दिए।
