डा. उपेन्द्र देवकोटाको स्वास्थ्यमा सुधार, भेन्टिलेटरबाट बाहिर निकालियो

न्यूरो अस्पताल बाँसबारीमा उपचार गराइरहेका प्रख्यात न्युरो सर्जन डा. उपेन्द्र देवकोटालाई भेन्टिलेटरबाट बाहिर निकालिएको छ । डा. देवकोटालाई शुक्रबार राति भेन्टिलेटरबाट बाहिर निकालिएको न्यूरो अस्पतालले जानकारी दिएको छ ।

उनको स्वास्थ्यमा केही सुधार आएको छ । तर डा. देवकोटालाई अहिले पनि सघन उपचार कक्ष, आइसियुमा राखिएको न्यूरो अस्पतालका प्रमुख कार्यकारी अधिकृत वसन्त देवकोटाले बताए ।

डा. देवकोटाका बारेमा बाहिर आएका कुरा सबै हल्ला रहेको र उनको उपचार भइरहेको सिइओ वसन्त देवकोटाले देश सञ्चारलाई जानकारी दिएका छन् । डा. उपेन्द्र देवकोटा गएको वैशाख १५ गतेदेखि न्यूरो अस्पतालमा उपचारका लागि भर्ना भएका छन् ।

स्वास्थ्यमा समस्या देखिएपछि गएको नोभेम्बर २१ मा बेलायत गएका डा. देवकोटा गएको अप्रिलसम्म उतै रहेका थिए । तर त्यहाँ उपचार सम्भाव नभएपछि उनी जीवनको अन्तिम क्षण नेपालमै बिताउने भन्दै गएको वैशाख १५ मा आएका हुन् । त्यसयता उनको न्यूरो अस्पतालमा उपचार हुँदै आएको छ ।

डा. देवकोटा पित्त थैलीको क्यान्सरबाट ग्रस्त छन् । उनको कलेजोको भेट्नोमा मासु पलाएको छ । आफूलाई लागेको जटिल रोगको बेलायतमा उपचार गराउँदा पनि सम्भव नभएपछि डा. देवकोटा नेपाल आएका हुन् । उनको कलेजोको भेट्नोमा मासु पलाएको (कोलोन्जियो कार्सीनोमा) । यसको उपचारका लागि उनले बेलायतमा किमो लिएका थिए ।

देश सञ्चारसँग डा. देवकोटाले आफ्नो अनुभाव सुनाउने क्रममा केही समयअघि भनेका थिए, ‘ मलाई लागेको रोगको उपचार भनेको ‘किमो’ दिएर ट्युमरको साइज घटाउने अनि अपरेसन गरेर आधा लिभर फाल्ने हो । त्यसमा विशेषज्ञता हासिल गरेका डाक्टर पाल रस (क्यान्सर विशेषज्ञ) ले काम गरेकै हुन् ।’

उनलाई गएको जनवरी २५ मा बेलायतमा किमोको पहिलो डोज दिइएको थियो । किमोपछि पनि डा. देवकोटामा ल्युकोपोनिया र कलेन्जाइटिसको समस्या भने थियो नै । डा. देवकोटाले जेनतेन तीन चरणको किमो त लिए तर ट्युमर घट्नुको साटो बढ्दै गएको देखियो । उपचारमा रहेका डा. पालले डा. देवकोटामा उपचारले रेस्पोन्ड नगरेको बताए ।

उनले देश सञ्चारसँग केही समयअघि भनेका थिए, ‘सिटी स्क्यान गर्दा ट्युमर फैलिएको देखियो । त्यो दुःखद थियो । फस्ट लाइन किमो प्रभावकारी नभएमा सेकेन्ड लाइन किमो पनि त्यत्ति प्रभावकारी हुँदैन । रेडियोथेरापी त्यत्ति प्रभावकारी नहुँदा सर्जरी नै गरिन्छ । रेडिएसनमा किरणले आन्द्राहरु सुकाउँछन् । त्यहीँ नै बसेर उपचारलाई निरन्तरता दिनुको अर्थ थिएन ।’ त्यसपछि उनी नेपाल आएका हुन् ।

किमोले रेस्पोन्ड नगर्ने रेडियोथेरापीको साइड इफेक्ट धेरै हुन्छ र सर्जरी पनि गर्न नमिल्ने अवस्था आउँछ । जीवनको अरु कुनै उपायहरु नदेखिएपछि डा. देवकोटा एक्सपेरिमेन्टल ट्रिटमेन्ट गरेर बस्नुभन्दा समयमै देश फर्केर बाँकी नेपालमै आफ्नाहरुको साथमा बिताउँछ भनेर आएका हुन् ।