यो सरकार धुपौरे होइन,मुलुकको कायाकल्प गर्छ त्यसका लागी मन्त्री र सचिबले यसो-यसो गर्नु भन्दै ओलीले दिए निर्देशन
प्रधानमन्त्री केपी शर्मा ओलीले हालै संसदमा प्रस्तुत नीति तथा कार्यक्रम र बजेट कार्यान्वयनका लागि कार्ययोजना बनाउन मन्त्रीहरुलाई निर्देशन दिएका छन् । प्रधानमन्त्री ओलीले सबै मन्त्री तथा मन्त्रालयका सचिवहरुलाई राखेर यस्तो निर्देशन दिएका हुन् ।
अर्थमन्त्री डा. युवराज खतिवडाका अनुसार प्रधानमन्त्री ओलीले बजेट कार्यान्वयनको कार्यतालिका, संरचनागत तयारी, कर्मचारी व्यवस्थापन, कानुन निर्माणलगायत काम गर्न मन्त्रालयहरुलाई निर्देशन दिएका हुन् ।
असार २५ भित्र सबै काम गरिसक्ने गरी काम अगाडि बढाउन प्रधानमन्त्रीले निर्देशन दिएको खतिवडाले जानकारी दिए । प्रधानमन्त्रीले असार १५ भित्र सबै मन्त्रालयका सचिवलाई पनि आफ्नो मन्त्रालयको कार्ययोजना पेश गर्न निर्देशन दिएका छन् ।
बजेट अहिले संसदमा छलफलको क्रममा छ भने नीति तथा कार्यक्रम पारित भइसकेको छ ।
मन्त्री तथा सचिवहरुलाई नीति तथा कार्यक्रम र बजेट कायान्वयन गर्न निर्देशन दिदै प्रधानमन्त्री ओलीले भने,’ यो सरकार पुजारी जस्तो होइन । बिहान उठ्ने मन्दिर जाने पुजागर्ने । अनि भोलि फेरि उही रित दोहोर्याउने ।
प्रधानमन्त्री ओलीले देशलाई नयाँ ढंगले अघि बढाउने भन्दै वर्तमान सरकार विगतको निरन्तरता मात्रै नभएको दावी गरे ।
देशमा लोकतन्त्र आइसकेको, बजनताका अधिकार स्थापित भइसकेको अवस्थामा जनताका अपेक्षा पनि सरकारप्रति धेरै रहेको बताउँदै उनले जनअपेक्षा पूरा गर्नका लागि सबै मन्त्रालयहरुले योजनाबद्ध ढंगले काम गर्नुपर्ने बताए ।
विकासप्रति नयाँ दृष्टिकोण बनाउनुपर्ने प्रधानमन्त्री ओलीको भनाइ छ । प्रधानमन्त्री ओलीले असार २५ गते मन्त्रालयले बनाएको योजनामा व्यापक छलफल गरी साउन १ गतेबाट कार्यन्वयनको काममा गति दिन पनि मन्त्रीहरुकेा गम्भीर ध्यानाकर्षण गराएका छन् ।
‘हरेक मन्त्रालयले के कस्ता कार्यक्रम सञ्चालन गर्ने, कसरी गर्ने त्यसका लागि असार १५ गते भित्रमा ठोस योजना लिएर आउनुहोस’ प्रधानमन्त्री ओलीले मन्त्री र सचिबहरुलाई निर्देशन दिँदै भने, ‘असार २५ गते ती योजनाको बिषयमा ब्यापक छलफल गरेर साउन १ गतेदेखि कार्यन्वयन सुरु गर्नु पर्दछ ।’
