इन्स्पेक्टर र डीएसपीको बढुवामा अन्याय : सोर्सफोर्स र शक्तिकेन्द्र नहुनेको बिचल्ली

नेपाल प्रहरीका अधिकृतहरुको बढुवा सिफारिस विवादमा परेको छ । २०७५ जेठ १८ गते मध्यरातमा जेठ १९ गते शनिवारको मितिमा निकालिएको डीएसपी र एसपी बढुवामा बरियता मिचिएको गुनासो छ । नेपाल प्रहरीले ५५ डीएसपी र २८ एसपीमा बढुवाका लागि सिफारिस गरेको हो ।

 

बढुवामा बरियताका आधारमा अगाडि रहेकाहरुलाई पछि पारेर घोर अन्याय गरेको पाइएको छ । कतिपय योग्य डीएसपीहरु बढुवामै पर्न सकेनन् । आइजीपी खनालले अडान लिन नसक्दा सोर्सफोर्स नहुने, सक्षम र ब्यवसायिक प्रहरी अधिकृतहरु पनि एसपी बढुवामा छुटेको गुनासो छ ।

इन्स्पेक्टरबाट डीएसपी र डीएसपीबाट एसपीमा बढुवा गर्दा योग्यता, क्षमताको कदर नगरी गृहमन्त्री र उनका आसेपासेहरुको सिफारिसलाई आइजीपी सर्वेन्द्र खनालले समेत सहमति जनाएर सिफारिस  गरिएको छ । संगठनमा राम्रो काम गरेर पुरस्कार पाएका डीएसपीहरु श्यामकृष्ण अधिकारी, भीम दाहाल, रमेश बस्नेत, रविन्द्र रेग्मी, गोविन्द अधिकारीहरु एसपी बढुवामै परेनन् ।

श्यामकृष्ण अधिकारी रौतहटमा हु“दा राम्रो काम गरेबापत पुरस्कृत भएका थिए भने भीम दाहाल रानीबारी हत्याकाण्डको सफल अनुसन्धान गरेका अधिकृत हुन् । बढुवा समितिका अध्यक्ष हरि पुडासैनीका भाइ अच्यूत पुडासैनीलाई एक नम्बरमा बढुवा सिफारिस गरिएको छ । जो खासै कमाण्ड क्षमता भएका अधिकृत मानिदैनन् ।

 

अवकाशको मुखमा डीएसपी प्रताप गुरुङलाई माथि ल्याइएको छ । प्रहरीको नेतृत्वमा पुग्न सक्ने संभावना भएका सोमेन्द्रसिंह राठौर र भूपेन्द्र खत्रीलाई पछाडि पारिएको छ । कृष्णबहादुर पल्लीमगर, सानुराम भट्टराई क्षमता नभए पनि सोर्सफोर्स र शक्तिकेन्द्र कै जोडबलमा एसपी बढुवामा अगाडि ल्याइएका छन् । इन्स्पेस्क्टरमा आफ्नो समूहमा एक नम्बर डीएसपी आभूषण तिम्सिना पनि एसपी बढुवामा २१ नम्बरमा पुगेका छन् ।

समग्रमा प्रहरी अधिकृतहरुको बढुवामा न्याय नभएको, शक्ति केन्द्रहरुको  चलखेल भएको गुनासो सुनिएको छ । बढुवा सिफारिस समितिको सचिवालयले २०७५ जेठ १९ गते शनिवार राति प्रकाशित गरेको प्रहरी नायब उपरीक्षकबाट उपरीक्षहरुको बढुवा राजनीतिक दबावमा गरेको गुनासो छ । मुख्यालयले गरेको बढुवा सिफारिसमा योग्य अधिकृतहरुले असन्तुष्टि जनाएका छन् ।

प्रहरी मुख्यालयले गरेको डीएसपीबाट एसपी बढुवामा एक नम्बरमा रहेकी गंगा पन्तलाई १५ नम्बरमा पु¥याइएको छ भने ३३ नम्बरमा रहेका डीएसपी अच्युतमप्रसाद पुडासैनीलाई १ नम्बरमा बढुवा सिफारिस गरिएको छ । डीएसपी पुडासैनी बढुवा समितिका अध्यक्ष समेत रहेका गृहमन्त्रालयका सहसचिव हरि पुडासैनीका भाइ नाता रहेको बताइएको छ ।

त्यसैगरी डीएसपीमा वरियतामा ३८ नम्बरमा रहेका प्रतापकुमार गुरुङलाई दोस्रो नम्बरमा बढुवा सिफारिस गरिएको छ । बढुवामा प्रधानमन्त्री केपी शर्मा ओलीका प्रमुख सुरक्षा अधिकृत डीएसपी सानुराम भट्टराईले पनि फड्को मारेका छन् । उनी १५ नम्बरबाट एकै पटक चार नम्बरमा बढुवा सिफारिस भएका छन् ।

प्रहरीमा काम गर्ने अधिकृतका रुपमा चिनिएका सोमेन्द्रसिंह राठौरलाई समेत बढुवामा पछि पारिएको छ । डीएसपीको वरियतामा चार नम्बरमा रहेका राठौरलाई ९ नम्बरमा पु¥याइएको छ । राठौर अप्रेसनमा समेत निकै अब्बल अफिसरका रुपमा चिनिन्छन् ।

इन्सपेक्टरबाट डीएसपीमा पनि उस्तै

नेपाल प्रहरीको मुख्यालयले जेठ १९ गते शनिवार साँझ गरेको ५५ जना डीएसपीको बढुवामा समेत वरियता मिचिएको छ । इन्स्पेक्टरको वरियतामा १ नम्बरमा रहेका रेवती रमण पोखरेललाई ३५ नम्बरमा पु¥याइएको छ । तीन नम्बरमा रहेका इन्सपेक्टर रोशन खड्कालाई ५० नम्बरमा पु¥याइएको छ । खड्का अपराध महाशाखामा कार्यरत छन् ।

उनी प्रहरीमा अप्रेसनमा अब्बल अधिकृतका रुपमा चिनिन्छन् । बढुवामा अन्य धेरै अधिकृतको वरियता तलमाथि पारेर अन्याय गरिएको पाईएको छ । वरियता र कार्यदक्षताको आधारमा बढुवा हुनुपर्नेमा बढुवामा राजनीतिक दबाव र नातावाद हावी भएको भन्दै योग्य अधिकृतहरुले बढुवा सिफारिसमा असन्तुष्टि जनाएका छन् ।

प्रहरी महानिरीक्षक सर्वेन्द्र खनालले आफू  वरियताका आधारमा प्रहरी महानिरीक्षक बनेको तर, अन्य अधिकृतहरुको बढुवामा अन्याय हु“दा किन न्याय दिएनन् भन्ने प्रश्न खडा भएको छ ।

प्रहरीको बढुवा–सरुवामा योग्य अधिकृतहरुलाई पाखा लगाएर प्रहरी हेडक्वार्टरले राजनीतिक दबावमा काम गरेको गुनासो प्रहरी अधिकारीले लगाउने गरेका छन् । बढुवा र सरुवामा प्रहरी हेडक्वार्टरले काखापाखा गरेकाले सक्षम अधिकृत हतोत्साहित हुन पुगेको गुनासो रहेको छ । (२०७५ जेठ २१ गतेको साँघु साप्ताहिकबाट)