योजनाबद्ध ढंगले वकिलको सल्लाहमा सुन तस्करीका मतियार एसएसपी खत्रीले यसरी गरे आत्मसमर्पण

फागुन १९ गते मोरङको उर्लावारीमा सनम शाक्यको शव फेला परेपछि साढे ३३ किलो सुन प्रकरण चर्चामा आएको थियो । सनमका परिवारले सुन तस्करले सनमको हत्या गरेको भन्दै गोरे भनिने चूडामणि उप्रेतीलगायत विरुद्ध प्रधानमन्त्री तथा मन्त्रिपरिषदको कार्यालय र गृह मन्त्रालयमा उजुरी दिए ।

सनमका परिवारले दिएको उजुरीअनुसार चैत २० गते बसेको मन्त्रिपरिषद बैठकले सुन तस्करी र सनम शाक्य हत्याको छानवीन गर्न गृहमन्त्रालय सह–सचिव ईश्वर पौडेलको नेतृत्वमा उच्च स्तरीय छानवीन समिति गठन गर्यो । समितिले पूर्णता पाएको दिनदेखि नै सुन तस्करी प्रकरणमा संलग्नलाई पक्राउ गर्न थाल्यो ।

यही मेसोमा प्रहरी प्रधान कार्यालयमा कार्यरत प्रहरी बरिष्ठ उपरीक्षक श्याम खत्रीले १० दिने विदा स्वीकृत गराए र एकाएक भारत हान्निए ।

भारतीय आर्मीका छोरा हुन् खत्री

प्रहरीका निलम्बित एसएसपी खत्रीको जन्मघर गुल्मी हो । उनका बुवा भारतीय सेनामा कार्यरत थिए । खत्री ८ वर्षको हुँदा नै उनका बुवाको निधन भयो । त्यसपछि खत्रीले भारत सरकारको तर्फबाट नै निःशुल्क उच्च शिक्षासम्मको अध्ययन गर्ने छात्रबृत्ति पाए ।

नेपाली समूदायको बाहूल्य रहेको भारतीय राज्य उत्तराखण्डको राजधानी देहरादूनमा पढेका खत्री प्रहरी निरीक्षक (इन्सिपेक्टर)को रुपमा नेपाल प्रहरीमा भर्ना भए ।

प्रहरी सेवा अवधिमा उनले आकर्षक मानिने भन्सार, विमानस्थल र आर्थिक रुपमा लाभ हुने क्षेत्रमा काम गर्ने मौका पाए । कालान्तरमा उनको सम्पर्क विभिन्न सुन तस्कर हुँदै चूडामणि उप्रेती ‘गोरे’सँग स्थापित हुन पुग्यो ।

प्रहरी उच्च स्रोतका अनुसार गोरेले खत्रीकै सल्लाह र निर्देशनअनुसार नेपालमा सुन भित्र्याउने गर्थे । खत्रीले भनेबमोजि सुन ल्याउँदा प्रहरीले समात्ने कुनै खतरा हुँदैन थियो, गोरेसहितका तस्करलाई ।

सुन तस्करी काण्डको पुर्पक्षका लागि हाल थुनामा रहेका गोरेले मोरङ जिल्ला अदालतमा दिएको बयानमा श्याम खत्रीलाई पक्राउ गरे सुन तस्करीका सबै नेक्सस खुल्ने बताएका थिए ।

गोरेले दिएको बयानअनुसार खत्रीले १ किलो सुन तस्करी गरेर ल्याउँदा ५० हजार रुपैयाँ लिन्थे । त्रिभुवन अन्तर्राष्ट्रिय विमानस्थलबाट सुन भित्र्याउने खत्रीको छुट्टै च्यानल नै थियो । सो च्यानमार्फत गोरेको समूहले मात्रै ५०० किलोसम्म सुन तस्करी गरेर भित्र्याएको गोरेले नै बयानमा भनेका छन् । यसहिसावले खत्रीले सुन तस्करी गरेर २ करोड ५० लाख रुपैयाँ लिएको देखिन्छ ।

गोरेसँग पटक पटक झगडा

२२ पुस २०७३ मा प्रहरीको केन्द्रीय अनुसन्धान ब्यूरो सिआईबीको टोलीले त्रिभुवन अन्तर्राष्ट्रिय विमानस्थलको गोल्डेन गेट अगाडिबाट ३३ किलो ५७७ ग्राम सुन बरामद ग¥यो । सुनसहित सिआईबीले ३ जनालाई पनि पक्राउ गरेको थियो । सो सुन तस्करीमा खत्रीको प्रत्यक्ष संलग्नता देखिएपछि सिआईबीले उनलाई ४ माघ २०७३ मा प्रहरी प्रधान कार्यालयबाटै पक्राउ गर्यो ।

काठमाडौं जिल्ला अदालतले २ लाख धरौटीमा रिहा गरेका खत्री त्यसपछि पनि सुन तस्करसँग निरन्तर सम्पर्कमा रहे । प्रहरी स्रोतका अनुसार सुन तस्करीका नाइके गोरे र खत्रीबीच धेरे पटक झगडा समेत भयो । सुन तस्करी पछिको लेनदेनका विषयमा खत्री र गोरेबीच धेरै पटक झगडा भएको उच्च स्रोत बताउँछ ।

देहरादूनमा ‘छुट्टि मनाएर’ अदालतमा आत्मसमर्पण

१० दिनको विदा स्वीकृत गराएर भारतको देहरादून पुगेका खत्रीले अन्ततः बिहीवार जिल्ला अदालत मोरङमा आत्मसमर्पण गरेका छन् । सुन तस्करीमा संलग्न रहेको भन्दै खत्रीविरुद्ध संगठित अपराध निवारण ऐन र भन्सार ऐनलगायत अन्तर्गत गत वैशाख १९ गते जिल्ला अदालत मोरङमा मुद्दा दर्ता भएको थियो ।

खत्री निकट स्रोतका अनुसार उनी पहिले नै अदालतमा उपस्थित हुन चाहन्थे । सुन तस्करी र सनम शाक्य हत्या प्रकरणमा पक्राउ परेका ३० जनाको थुनछेक बहस चलिरहँदा नै खत्रीले अदालतमा आत्मसमर्पण गर्ने सोच बनाएका थिए । तर उनका कानून व्यवसायीले रोकेको पारिवारिक स्रोतको भनाइ छ ।