मोदी भेट्न कांग्रेस नेताको यस्तो लर्को,मोदी संग कानेखुसी गर्ने पर्खाईमा प्रचण्ड
नेपाल भ्रमण रहेका भारतीय प्रधानमन्त्री नरेन्द्र मोदीले प्रमुख प्रतीपक्षी नेपाली कांग्रेसका नेताहरूसँग सामूहिक भेटवार्ता गरेका छन्।
शनिबार अपरान्ह राजधानीको होटल हायतमा भेटवार्ता भएको हो।
मोदीसँगको भेटमा सभापति शेरबहादुर देउवा, बरिष्ठ नेता रामचन्द्र पौडेल, उपसभापति विमलेन्द्र निधि, महामन्त्रीद्वय शशांक कोइराला र पूर्णबहादुर खड्का, कोषाध्यक्ष सीतादेवी यादव र नेताहरू विजयकुमार गच्छदार, कृष्णप्रसाद सिटौला र प्रकाशशरण महत उपस्थित थिए।
भेटमा सभापति देउवाले नेपाल भ्रमण गरेकोमा मोदीलाई धन्यवाद दिएको र मोदीले नेपाल भ्रमण सफल भएकोमा खुसी व्यक्त गरेको उपसभापति विमलेन्द्र निधिले जानकारी दिए।
मोदीले दुबै देशको साझा उद्देश्य विकास भएको उल्लेख गर्दै आपसमा हुने भ्रमणले एकअर्काको विकासबारे जानकारी हुने भएकाले प्रदेश र स्थानीय सरकारस्तरका भ्रमण पनि हुनु पर्ने बताए।
‘नेपाल–भारतबीच राजनीतिक भ्रमणको आदान–प्रदान एकदमै महत्वपूर्ण छ,’ मोदीलाई उद्धृत गर्दै निधिले भने, ‘तपाईँहरूले सातै प्रदेशमा सरकार बनाउनु भएको छ, स्थानीय तहमा पनि सरकार छन्। उहाँहरूले पनि भारत भ्रमण गरे हुन्छ। दिल्ली र बनारसमात्र होइन अन्य ठाउँमा पनि आउनुस्, भारतले कसरी विकास गरेको रैछ भन्ने हेर्न पाइन्छ।’
मोदीले अन्य दलका नेताहरूसँग पनि भेटवार्ता गर्दै छन्। भेटका लागि माओवादी केन्द्रका अध्यक्ष पुष्पकमल दाहाल होटल हायत पुगिसकेका छन्।
राजनीतिक भेटघाट सकिएपछि उनी काठमाडौं महानगरले गर्ने नागरिक अभिनन्दनमा सहभागी हुनेछन्। मोदी आजै स्वदेश फर्कने कार्यक्रम छ।