प्रचण्ड घर बनाउने जग्गा खोज्दै,हेरेका दुई जग्गा मध्ये एक किन्ने यस्तो छ दाउ
नेकपा माओवादी केन्द्रका अध्यक्ष पुष्पकमल दाहाल प्रचण्ड कास्कीको ढिकुरपोखरीमा घर बनाउने जग्गा खाजी गरेका छन् । प्रचण्ड आफ्नो परिवार बस्ने घर बनाउनका लागि जग्गा खोज्दै जन्मथलो कास्कीको ढिकुरपोखरी पुगेका हुन् ।
माक्र्सको द्विशतबाषिर्की कार्यक्रममा सहभागी हुन पोखरा आएका प्रचण्डले कास्कीको अन्नपूर्ण गाउँपालिका वडा नम्बर १ लेवाडे जग्गासमेत हेरे । पत्नी सीता दाहाल र छोरी गंगा दाहालसहित लेवाडे पुगेका प्रचण्डले २ ठाउँ जग्गा हेरेका छन् । उनले दुई मध्ये कुनै एउटा जग्गा किन्ने सोच बनाएको भाइ मुक्तिराम दहालले जानकारी दिए ।
भावनात्मक रुपमा ढिकुरपोखरी नजिक भएकाले घर बनाउने सोच आएको भनदै प्रचण्डले दिर्घकालीन रुपमा बस्नका लागि नभएपनि पोखरा आउँदा बस्नका लागि जग्गा लिन लागेको बताए । ‘यहाँ आएपछि बचपनका यादहरु सबै ताजा भएर आउँछन्’ उनले भने, ‘यहाँको माटो र यहाँका जनतासँग भावुकता र आत्मियता छ, त्यसैले १ टुक्रा जमिन मेरो छ भन्ने बनाउनका लागि जग्गा किन्ने सोंच बनाएको हुँ ।’
आफूले जन्मथलो ढिकुरपोखरीका लागि अहिलेसम्म केहि गर्न नसकेको भन्दै प्रचण्डले घर बनाएपछि जन्मस्थानसँग अपनत्व पनि हुने र स्थानियसँग भेट भएर भलाकुसारी गर्न पाइने बताए । सो ठाउँको विकासमा पनि योगदान दिन पाइने भएकाले आफूले घर बनाउने सोच बनाएको जनाए ।
