ओलीलाई साग गलाए झैँ गलाएका प्रचण्डलाई सुर्यले यसरी पोल्यो,यी कुरामा दुबैको बार्गेनिङ्ग मिल्यो
एमाले र माओवादी केन्द्रबीच पहिलो पटक पार्टी एकताका मुलभूत विषयमा विवाद टुंगिएको छ । एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ बीच विवादका तीनवटै विषयमा सहमति जुटेको हो ।
पार्टी एकता संयोजन समितिको बैठक बसेर पार्टी एकता घोषणाको मिति तय गर्नेछ । ओली र प्रचण्डबीच बिहीबार भएको वार्तामा केन्द्रीय कार्यसमितिको भागवण्डा, चुनाव चिन्हबारे सहमति जुटेको छ । ओली र प्रचण्डबीच बिहीबार दुई पटक छलफल भएको थियो ।
चुनाव चिन्ह सूर्य नै हुने भएको छ । सूर्य चुनाव चिन्हमा सहमत नभएका दाहालले केन्द्रीय समितिमा सहभागिताको विषयमा एमाले लचक भएपछि अडान छाडेका छन् । २९९ सदस्यीय केन्द्रीय समितिमा माओवादीले ४० प्रतिशतभन्दा बढी पाउँनेछ ।
अन्य पदीय भागबण्डामा एमाले ७० र माओवादीले ३० प्रतिशत पाउँनेछन् । स्थायी समिति, पोलिटब्यूरो र केन्द्रीय कमिटी छरितो बनाउने, निर्वाचन आयोगको कानुन अनुसार महाधिवेशनबाट नयाँ नेतृत्व छान्ने विषयमा पनि सहमति भएको छ । ४० प्रतिशत सदस्य दिन अस्वीकार गरेका ओली बिहीबार भने लचक भएका छन् । वैचारिक तथा सांगठनिक प्रतिवेदनमा संशोधन गरेर टुंगो लगाउने दुई अध्यक्षको सहमति छ ।
दुवैजना अध्यक्ष रहने गरी मूल नेतृत्वको विषय टुंग्याइएको छ । दुई अध्यक्षबीच द्वि–अध्यक्षात्मक प्रणालीमा सहमति भएपछि पार्टी एकीकरण हुने पक्का भएको हो । राजनीतिक दलसम्बन्धी ऐन–२०७४ को दफा १० मा दुई वा दुईभन्दा बढी दलहरु एक–आपसमा एकीकरण हुन सक्ने व्यवस्था गरिएको छ ।
दफा १० अनुसार पार्टी एकता गर्ने सम्झौता भएको ४५ दिनभित्रमा एकीकृत पार्टीको विधान, केन्द्रीय समितिको निर्णय र सम्झौताको प्रतिलिपिसहित आयोगमा निवेदन दिनुपर्नेछ ।
