३३ किलो सुन प्रकरणमा मुछिएका फरार एसएसपी लोहनी प्रहरीको सम्पर्कमा,यसरी हुदैछ कारबाही
साढे तेत्तीस किलो बेपत्ता भएको सुन र उर्लाबारीका सनम शाक्य हत्या प्रकरणमा मुछिएका अपराध अनुसन्धान महाशाखा काठमाडौंका प्रमुख एसएसपी दिवेश लोहनी जिल्ला प्रहरी कार्यालय मोरङको सम्पर्कमा आएका छन्। लोहनी सार्वजनिक विदाको दिन मंगलबार अपरान्ह करिब ४ बजे कार्यालयको सम्पर्कमा आएका हुन्।
केही दिनअघि उनलाई मोरङ झिकाउनका लागि प्रहरी कार्यालयले पत्राचार गरेको थियो। उनीसँगै सुरुमै विवादमा तानिएका महाशाखाका डीएसपी प्रजित केसी र सई बालकृष्ण सञ्जेल पक्राउ परिसकेका छन् । स्रोतका अनुसार सरकारी वकिल कार्यालयले लोहनी विरुद्ध पनि अन्य अभियुक्तसँगै बुधबार अभियोग पत्र तयार पारेर अदालतमा दर्ता गर्ने सम्भावना छ ।
छानविन समितिले लोहनीसँग काठमाडौंमा यसअघि बयानसमेत लिइसकेको छ । उनीसँग बयान लिएर निगरानीमा राख्दै छानबिन समिति अन्य अभियुक्त पक्राउमा केन्द्रित बनेको थियो । यस घटनासम्बन्धी मुद्दा भोलि (बुधबार) जिल्ला अदालत मोरङमा दर्ता हुँदैछ । मोरङ प्रहरीले अनुसन्धान सकेर मिसिल बुझाएपछि सरकारी वकिल कार्यालयले मुद्दा दर्ता गर्ने भएको हो ।
