बाम सरकार बिरुद्द रमेश खरेल उत्रिए,सरकारको निर्णयलाई लात हान्दै यसरी दिने भए राजिनामा
प्रहरी महानिरीक्षक नियुक्तिमा असन्तुष्टि जनाँउदै डिआईजी रमेश खरेलले बुधबार राजिनामा दिने भएका छन्। बुधबार दिउँसो प्रहरी महानिरीक्षकको सचिवालयमा लगेर राजिनामा बुझाउने उनको तयारी छ।
सरकारले मंगलबार डिआईजी सर्बेन्द्र खनाललाई प्रहरी महानिरीक्षकमा नियुक्त गरेको थियो। आफ्नो उचित मूल्याङकन नभएको भन्दै खरेलले राजिनामा दिन लागेका हुन्। खरेलले यसबारेमा औपचारिक रुपमा केही बोल्न चाहेनन्। तर, राजिनामा दिन लागेको पुष्टि गरे। उनका एक सहयोगीका अनुसार राजिनामापत्र तयार भइसकेको छ।
नेपाल प्रहरीका ‘हिरो’ प्रहरी अधिकृतका रुपमा चिनिएका खरेललाई डिआईजी बढुवामा पछि पारिएको थियो। एसएसपीमा पहिलो नम्बरमा रहेका उनलाई शेरबहादुर देउवा नेतृत्वको सरकारले दोस्रो नम्बरमा डिआईजीमा बढुवा गरेको थियो। त्यसअघि उनी सधैं आफ्नो ब्याचमा एक नम्बरमा बढुवा हुँदै आएका थिए। सरकारले त्यसबेला पहिलो नम्बरमा बढुवा गरेका सर्वेन्द्र खनाल सोमबार आईजिपीमा बढुवा भए। खनालले भने खरेललाई फोन गरेर राजिनामा नदिन आग्रह गरेका छन्।
खरेल २०४५ साल फागुन १ गते भलिबल खेलाडीका रुपमा प्रहरी जवान पदबाट प्रहरी सेवा प्रबेश गरेका थिए। १० महिनापछि उनले अनिवार्य अवकाश पाउँदैछन्। नेपाल प्रहरीमा उनी ‘पहिलो हिरो’ का रुपमा चिनिन्छन्।
एसपी पददेखि खरेलको चर्चा सुरु भएको थियो। सप्तरीको जिल्ला प्रहरी प्रमुखका रुपमा काम गर्दा अपराधीविरुद्ध आक्रामक रुपमा प्रस्तुत भएपछि उनको चर्चा सुरु भएको थियो। त्यसपछि पोखरा, पर्सा र काठमाडौंको प्रहरी प्रमुखको रुपमा उनले चर्चा चुलिएको थियो। कसैको दबाब नमान्ने र लोभमा नपर्ने कारण उनी जनमानसमा रोलमोडल भने।
उनको त्यही चर्चा पछि प्रहरीमा ‘ट्रेन्ड’ बन्यो। तर, नेताहरुसँग भने उनको सम्बन्ध बिग्रदै गयो। जसकारण डिआईजी बढुवामा उनी पछि परे। त्यही एग्रेसिभ पुलिसिङ नै आईजिपी बन्ने सपनाका लागि बाधक बन्यो।
आईजिपीका अर्का प्रमुख प्रतिस्पर्धी पुष्कर कार्कीले भने सरकारको निर्णय स्वीकार्ने बताएका छन्।
आईजिपीका तिनै जना प्रतिस्पर्धी उत्तिकै काबिल मानिन्थे। प्रधानमन्त्री केपी शर्मा ओलीको रोजाईमा खरेल र कार्की भएपनि प्रचण्डको अडानपछि सरकारले खनाललाई नै आईजिपी बनाएको हो। बुधबारदेखि उनले कार्यभार सम्हाल्दैछन्।
