६९ किलोमिटर लामो नेपाल–भारत पेट्रोलियम पाइपलाइन बनाउन ओलीले गरे यस्तो सम्झौता
पेट्रोलियम पदार्थ आयातका लागि नेपाल–भारतबिच पाइपलाइन बनाउने सम्बन्धी सम्झौता पत्रमा हस्ताक्षर भएको छ । नेपाल–भारत पेट्रोलियम पदार्थ पाइपलाइन परियोजना अन्तर्गत भारतको मोतिहारीबाट नेपालको अमलेखगञ्जसम्म पाइपलाइन बनाउने विषयमा सम्झौता भएको हो ।
सम्झौता पत्रमा भारत भ्रमणमा रहेका नेपालका प्रधानमन्त्री केपी शर्मा ओली र उनका भारतीय समकक्षी नरेन्द्र मोदीले शनिबार हस्ताक्षर गरेका हुन् । उनीहरु दुवैले स्वीच दबाएर पाइप लाइनको शिलन्याश पनि गरेका छन् ।
यो पाइपलाइन ६९ किलोमिटर लामो हुनेछ । यस्तै मोतिहारीमा पम्पिङ्ग सुविधा रहने पाइपलाइनबाट वार्षिक २० लाख टन पेट्रोलियम पदार्थ निर्यात गर्न सकिन्छ । यो परियोजनाको कार्यान्वयन नेपाल आयल निगम र भारती आयल निगमले संयुक्त रुपमा गर्ने छन् ।
पेट्रोलियम पदार्थका लागि नेपालको एक मात्रै विकल्पको रुपमा भारत रहँदै आएको छ । अहिलेसम्म ट्यांकरमै भारतबाट पेट्रोलियम पदार्थ आयात हुँदै आएको छ । यो पाइपलाइन बनेपछि पने पेट्रोलियम पदार्थ आयातमा खर्च कटौती हुनुका साथै सहज पनि हुनेछ ।
