प्रधानमन्त्री ओलीलाई धारेहात लगाउदै लालबाबुले भने- मलाई रोक्न ओलीले किन यस्तो नीति बनाए?
परराष्ट्र मन्त्रालयको कूटनीतिकसम्बन्धी निर्देशनलाई प्रदेश २ का मुख्यमन्त्री लालबाबु राउतले आपत्ति जनाएका छन्। परराष्ट्र मन्त्रालयले कूटनीतिक नियोगका प्रमुखहरूसँगको भेटलाई ‘लगाम’ लगाएपछि राउतले आपत्ति जनाएका हुन्।
पछिल्लो समय स्थानीय तथा प्रादेशिक सरकार गठन भएसँगै कूटनीतिक नियोगका प्रमुखहरूले स्थानीय तहमा पुगेर भेटघाटलाई तीव्र बनाएपछि परराष्ट्रले ‘लगाम’ लगाउँदै निर्देशन जारी गरेको थियो।
मुख्यमन्त्री लालबाबु राउतले परराष्ट्रको निर्देशनलाई आफूलाई रोक्नकै लागि लागु गरिएको भन्दै आपत्ति जनाएका हुन्। वीरगंज उद्योग वाणिज्य सङ्घले वीरगंजमा आयोजना गरेको कार्यक्रममा उनले भने, ‘मैले मुख्यमन्त्रीको पदभार सम्हालेपछि काठमाडौंमा गएर यति धेरै डोनर एजेन्सी र विदेशी कूटनीतिज्ञहरूसँग भेटे कि, प्रधानमन्त्री केपी ओलीले म माथि रोक लगाउन परराष्ट्रको स्वीकृति लिनु पर्ने नियम नै ल्याउनु भयो।’
उनले प्रधानमन्त्री ओली र केन्द्र सरकार आफ्नो कामले चिन्तामा परेको आरोप लगाए। ‘मैले गरेका राम्रा काम देखेर प्रधानमन्त्री ओली र उनको सरकार चिन्तामा छ। तर मैले आफ्नो प्रदेशको विकास र समृद्धिको लागि गम्भीर भएर लागेको छु। चिन्ता लिएर केही हुनेवाला छैन’ उनले थपे, ‘मलाई थाहा छ मुलुककै उत्कृष्ट प्रदेश कसरी बनाउने हो भन्ने।’
मुख्यमन्त्री लालबाबुले प्रदेशलाई विकसित र समृद्ध बनाउन चीनको आर्थिक नीति ‘बलियो र इमान्दार नेतृत्वको’ सोच लागु गरी प्रदेशका आगामी नीति तथा कार्यक्रम ल्याउन लागेको जानकारी गराए।
