आफु जत्तिको सुन्दर अरु कोही नभएको भन्दै कृष्णको कथा सुनाएर कलाकारलाई यसरी हँसाए ओलीले
प्रधानमन्त्री केपी शर्मा ओलीले संसारभरमा नेपाली जत्तिको सुन्दर अरु कोही नभएको बताएका छन् । नेपाल चलचित्र कलाकार संघ ‘फान’ ले आयोजना गरेको दोस्रो ‘फान अवार्ड’ वितरण कार्यक्रममा बोल्दै ओलीले यस्तो बताएका हुन् ।
‘यो सुन्दरतामा अलिकति कला मिसाइदिएपछि जो पनि कायल हुनैपर्छ,’ भन्दै उनले कलाकारहरूलाई पनि आत्मविश्वासका साथ अघि बढ्न सुझाव दिए ।
हिन्दू धर्मशास्त्रहरूमा उल्लेख गरिएका मेनुका र उर्वशीको सुन्दरताको बयान गर्दै ओलीले दुनियाको अन्य कुनै शास्त्रमा यस्ता सुन्दर मान्छेहरूको व्याख्या नगरिएको बताए । सोही प्रसंगमा उनले राम र कृष्णको पनि नाम लिए ।
अवार्ड कार्यक्रम उद्घाटनमा बोलेका प्रधानमन्त्री ओलीले आफ्नो सरकारले कलाको विकास र प्रबर्द्धन गर्ने पनि बताए ।
‘कलाकारहरूले हामीलाई ऋण लगाउनु भएको छ, मेहेनत गरेर सिर्जना गरिएका संगीत र नृत्यहरू सुनेर हामी आनन्द मानिरहेका हुन्छौं, तर त्यसमा कति मेहेनत छ भन्ने हामीलाई थाहा हुँदैन,’ उनले यसो भनिरहँदा त्यहाँ उपस्थित कलाकारहरु मुसुमुसु हाँसिरहेका थिए ।
कार्यक्रममा कलाकार संघले उत्कृष्ट नायक, नायिका, निर्देशक, कथा, संवाद, नृत्यजस्ता विधामा अवार्ड वितरण गर्ने कार्यक्रम राखेको छ । यो वर्षको लाइफटाइम एचिभमेन्ट अवार्ड वरिष्ठ कलाकार नीर शाहलाई दिइने घोषणा यसअघि नै भइसकेको छ
