विदेशबाट आएका युवाको सुनको सिक्री प्रहरीले नै चोरे,लाखौं ठग्ने दुई बिदेशी पक्राउ, यस्तो थियो ठगी धन्दा ?

रक्षक नै भक्षक भएपछि कसको के लाग्छ ? यस्तै घटना भयो, काठमाडौंमा । समाजमा शान्ति सुरक्षा र अमनचयन कायम राख्ने कसम खाएका प्रहरी नै सुनको सिक्री लुटेको आरोपमा पक्राउ परेपछि सबै आश्चर्य चकित भएका छन् ।
कुरा हो, महानगरीय प्रहरी वृत्त गौशालाको । क्युआरटीमा कार्यरत प्रहरी जवान विश्वराज कुशवाह सोमबार साँझ विदेशबाट आएका एक नेपालीले ल्याएका दुईवटा सुनको सिक्री लुटेपछि प्रहरीकै फन्दामा परेका हुन् ।
एयरपोर्टस्थित सिसिटिभी फुटेजबाट कुशवाहले सिक्री चोरेको पत्ता लागेको हो । उनलाई निलम्बन गरी थप कारबाहीको प्रक्रिया अगाडि बढेको महानगरीय प्रहरी परिसर काठमाडौंले जनाएको छ ।

अनलाइन व्यापारको नाममा ठगी गर्ने दुई जनालाई प्रहरीले पक्राउ गरेको छ । बंगालादेशी नागरिक राहत हसन राना र भारतीय नागरिक तरसेम शर्मा पक्राउ परेका हुन् ।

करिब ६ महिना अघि नेपाल आएका यी दुईले अनलाइन व्यापार गर्ने फेरेक्स ईन्टरनेशनल अनलाइन मनी मार्केट कम्पनी अन्तरगतको वेस्टर्न एफएक्स नामक अनलाइन माकेर्टिङ कम्पनीको एजेन्ट बताएर ठगी गरेका हुन् । दुबैजनाले करिब ५० लाख रुपैयाँसम्म ठगी गरेको हुनसक्ने प्रारम्भिक अनुमान छ ।

प्रहरीका अनुसार लगानी गरे नाफाको २० देखि ६० प्रतिशत फाइदा पाउने प्रलोभन देखाएर उनीहरुले बीस जनाभन्दा धेरैसँग रकम असुलेका छन् । प्रहरी कहाँ आएका दुई पीडितले आफूहरुले सात लाख रुपैयाँ लगानी गरेको र त्यसवापत आउने मुनाफा नपाएपछि साँवा रकम फिर्ता माग्दा नपाएको भन्दै उजुरी गरेका थिए ।

फोरेक्स कम्पनीको आधिकारिक एजेन्ट बताउने बंगालादेशी नागरिक हसन गत असोजदेखि बत्तिसपुतलीमा फ्ल्याट नै भाडामा लिएर बस्दै आएका थिए । प्रहरीका अनुसार हसन ट्युनिसियाली गर्लफ्रेण्डसँग बस्ने र ठगीधन्दाको रकम मोजमस्तीमा उडाउने गरेको देखिन्छ ।

प्रहरीका अनुसार पैसा लगानी गरेपछि बंगालादेशीले लगानीकर्ताको नाममा एकाउन्ट खोलीदिन्थे तर त्यसको पासवर्ड र युजर नेम भने आफैंले राख्थे । प्रहरी परिसरका डिएसपी मोहन थापाका अनुसार लगानीकर्ताले अरु सदस्य खोजेर लगानी भित्रयाउन सके थप मुनाफा हुने भन्दै उनीहरुले धेरै भन्दा धेरै सदस्य बनाउन खोजेको देखिन्छ ।