विनयजंगको अनौठो नशा : सहकारीबाट ऋण लिएर होचा पुड्का कोषमा सहयोग

हाम्रो इकोनोमि

जीवनमा नशा भन्ने चिज बढो अनौठो हुन्छ । कुनै समय उनी कुलतको नशामा डुबे । कुलतबाट त बाहिरिए तर अहिले फेरि डुबेका छन सामाजिक कर्मको नशामा ।
उनको कर्म हो वेवारिसे शव जलाउने । अस्पताल पार्टी पौवा धर्मशाला कहिँ कतै वेवारिसे भेटिए आफ्नो भोक प्यास तिर्खा निन्द्रा सबै भुलेर ती वेवारिसेलाई अस्पताल पुर्याउने । उपचार गर्ने । आफन्त भेटिए तिनका जिम्मा लगाउने नभेटिए आफ्नै आश्रममा लाने । पालनपोषण गर्ने पुर्नेजीवन दिने । हालसम्म उनले यसरी पुर्नजीवन दिएका वेवारिसेहरुको संख्या तीन दर्जन बढी पुगिसकेको छ ।
कतैको जागिरे होइनन् । आम्दानीको स्रोत केही छैन् । आफन्तसँग ऋण खोज्छन,मनकारीहरुसँग सापटी माग्छन् र भेटिएका वेवारिसे लाशहरु जलाँउदै आएका छन्,जलाउछन् । यो कथा हो एक्सन फर सोसल चेन्ज नामक संस्थाका अध्यक्ष विनयजंग बस्नेतको ।
जस्ले हालसम्म ९६ वटा वेवारिसे लाशहरुको सद्गद् गरिसकेका छन् । उनका अनुसार एउटा लाशको सद्गद् गर्न कम्तिमा दश हजार रुपैंया लाग्छ ।
तर सबै साथीहरु मनकारी हुँदैनन् । एउटा मनकारीसँग एक लाख ऋण लिए,५० हजार तिरे बाँकी पैसा तिर्न नसक्दा मनले खाएको साथी प्रहरी गुहार्न गयो । अहिले त्यही ऋण तिर्न नसक्दा प्रहरीको झमेलामा छन् ।

जिन्दगी यता टाल्यो उता च्यातिन्छ । उता सिलायो अन्तै उध्रिन्छ । एकातिरको साथीलाई ऋण तिर्न सहकारीसँग ऋण लिन्छन । सहकारीको भाखा नाग्दा र समयमा ऋण तिर्न नसक्दा चढिरहेको मोटरसाइकल धरौटी राख्छन् ।
तै पनि मान्दैन उनको मन । समाजिक कर्मको नशामा डुबेका यिनै एक्सन फर सोसल चेन्जका अध्यक्ष विनयजंग बस्नेत बिहिवार भृकुटीमण्डपमा पक्तिकारसँग अपर्झट भेटिए ।
सोधखोज गर्दा उनी लम्कदै रहेछन होचा पुड्का संघका कार्यालयमा ।
यो यही संस्था हो जस्लाई यस अगाडिकै संस्थाका अध्यक्षहरुले चुसेर खोक्रो बनाए । संस्था डुबाए,आफू मोटाए । अहिले ती अध्यक्ष समानान्तर होचा पुड्का संघ खोलेर बसेका छन् ।
यो संस्था स्थापना भएदेखि नै ह्ृदयदेखि नै सहयोग गर्दै आएका व्यक्ति हुन विनयजंग बस्नेत । जस्का हालका अध्यक्ष छन् मनभरी जोश र जाँगरले भरिएका निर्मल मगराती ।
हो त्यही संस्था दौडियोस भनेर खोलिएको छ होचापुड्का कल्याणकारी कोष ।
गत शनिवार मात्र स्थापना भएको यो कोषका लागि उनै बस्नेतले १२ हजार सहयोग गरेका छन् । त्यो पनि सहकारीबाट ऋण लिएर । आजै भृकुटीमण्डपमा एक कार्यक्रमबीच संस्थाका अध्यक्ष मगरातीलाई एक्सन फर सोसल चेन्जका अध्यक्ष बस्नेत र सोही संस्थाको महिला विभाग प्रमुख पवित्रा लामाले सो रकम हस्तान्तरण गरेका हुन् ।
बस्नेतले सो सस्थालाई २५ हजार सहयोग गर्ने बचन दिएका छन् ।