फरार सांसद दीपक मनाङेलाई खोज्न प्रहरीले जारी गर्यो रेडकर्नर नोटिस,भारतमा लुकेको सुँइको पाए पछी प्रहरी सक्रिय

मनाङबाट प्रदेश सभा सदस्यमा निर्वाचित दिपक मनाङे भनिने राजीव गुरुङका नाममा इन्टरपोलले रेडकर्नर  नोटिस जारी गरेको छ । मनाङे देशबाहिर रहेको सूचना पाएपछि प्रहरीको अपराध अनुसन्धान विभागको पहलमा इन्टरपोलले रेडकर्नर नोटिस जारी गरेको स्रोतले जनाएको छ ।

इन्टरपोलले मुख्यालयले गत साता रेडकर्नर नोटिसमा राखेको जानकारी नेपाल प्रहरीलाई दिएको हो । मनाङेलाई अब इन्टरपोल सदस्य १ सय ९२ देशको प्रहरीले खोजी गर्नेछ ।

नेपाल प्रहरीले मनाङेको अदालत फैसला र विगतको पृष्ठभूमि पठाएपछि इन्टरपोल मुख्यालयले गत साता रेडकर्नर नोटिस जारी गरेको थियो । प्रहरी प्रवक्ता डिआइजी मनोज न्यौपानेले फरार मनाङेको तीव्र खोजी भइरहेको जानकारी दिएका छन् । २०६९ साउन २८ गते तत्कालीन पुनरावेदन अदालत पाटनले ‘ज्यान मार्ने उद्योग’ मुद्दामा मनाङेलाई पाँच वर्ष कैद सजाय तोकेको थियो । लामो समय गुपचुप रहेको फैसला पाँच वर्षपछि गत माघ २ गते सार्वजनिक भएको थियो । त्यसपछि प्रहरीले मनाङेको खोजी थालेको हो ।

२०६१ सालमा ‘गुण्डा नाइके’ चक्रे मिलन समूहसँग खुकुरी हानाहान हुँदा मनाङे समूहले चक्रे मिलनको हात छिनाएको थियो । सोही घटनामा संलग्न अन्य अभियुक्तहरु रेवती कार्की, रमेश सुनुवार, गणेश लामा र उमेश लामालाई माघ २ गते सर्वोच्च अदालतले सफाइ दिएपछि मनाङेलाई पुनरावेदनले पहिल्यै ५ वर्षको कैद सजाय सुनाएको रहस्य बाहिर आएको थियो ।