प्रहरी इन्काउन्टरमा ढलेका मनोजको ग्याङ्गका सदस्य खोज्दै प्रहरी,यी हुन् पुन समूहका फरार गुण्डा?

एक वर्षदेखि देशको आन्तरिक सुरक्षाको प्रमुख चुनौती बनेका गुन्डा नाइके मनोज पुन बुधबार प्रहरीकै गोलीबाट मारिए। प्रहरीसँगको ‘जम्काभेट’मा पुन र उनका प्रमुख सहयोगी सोम आले रुपन्देहीको देवदहमा मारिएका हुन्।

भारतमा बसेर नेपालमा हत्या र फिरौती असुलीको आतंक मच्चाउँदै आएका उनीहरुको मृत्युपछि गुन्डागर्दी समूह ध्वस्त भएको र अब आतंक बन्द हुने प्रहरीको अपेक्षा छ। तर, उनका सहयोगीहरु भने गुन्डागर्दीमै लाग्न सक्ने विश्लेषणका आधारमा उनीहरुको पनि प्रहरीले खोजी सुरु गरिरहेको छ।

मनोजका अधिकांश सहयोगीहरु पक्राउ परिसकेका छन्। पछिल्लो समय उनका विश्वासपात्र बनेका पदम चौधरीलाई गत महिना प्रहरीले पक्राउ गरेको थियो। चौधरी बसन्त पौडेलको हत्यामा संलग्न थिए।

सोही घटनाका सुटर विवेक नाम गरेका मनोजको गिरोहका सदस्य भने फरार छन्। उनको पूरा नाम र ठेगाना पनि प्रहरीले पत्ता लगाउन सकेको छैन।

त्यस्तै करिब २ वर्ष पुनको गिरोहका काम गरेका लोप्साङ लामा पनि फरार छन्। लोप्साङ गत वर्ष देवदहका दुर्गा तिवारीलाई गोली हान्ने व्यक्ति हुन्। पछिल्लो समय उनी मनोजभन्दा समिरमानसिंह बस्नेतको समूहमा आबद्ध थिए। निर्माण व्यवसायी महासंघका अध्यक्ष शरदकुमार गौचन हत्याका पनि उनी योजनाकार हुन्। उनलाई पनि प्रहरीले पक्राउ गर्न सकेको छैन।

त्यस्तै, मनोज र समिरकै समूहमा आबद्ध बोका भनिने गंगा लिङदेन, काले दाइ भन्ने अम्बरबहादुर राना, रोशन बुढाथोकी, अम्बर राना लगायत फरार छन्।

उनीहरुको पनि खोजी भएको र गुन्डागर्दीको समूह ध्वस्त पार्ने अभियानमा आफूहरु लागेको सिआइबीका एसएसपी धनश्याम अर्याल बताउँछन्।

यसरी ढालिएका थिए मनोज

फिरौती, धम्की र हत्या गरेर विपक्षीलाई ढाल्दै आएका रुपन्देहीका मनोज पुन र उसका सहयोगी बुधवार विहान आफै ढालिएका छन्। भारतको गोवामा पक्राउ परेका गुण्डा नाइके मनोज पुनसहित उनका एक सहयोगी सार्प सुटर सोम आले पक्राउ परेको ३ दिनपछि उनकै जिल्ला रुपन्देहीमा ढालिएका हुन्।

केन्द्रीय अनुसन्धान व्यूरो सिआइबीले सहयोगी सहित पुनलाई नै ढालेको हो। प्रहरीले उनीहरु दुवैलाई छाती र कोखामा गोली हानेको अस्पतालमा देखिएको छ। वाइकमा सवार उनीहरुलाई प्रहरीले भवानीपुरमा पछ्याउने क्रममा गोली हानेको घटनाक्रम प्रहरीले इन्काउण्टर भएको भनिएको ठाउँमा देखिएको छ।

नेपाल प्रवेश गराउने वित्तिकै पुन सहित सहयोगी सोम आलेलाई रुपन्देहीको देवदह–४, भवानीपुरमा सिआइबीले इन्काउण्टर गरेको हो। रुपन्देहीकै एमालेका पूर्व कार्यकर्ता रहेका पुन हत्या, धम्की र फिरौतीमा संलग्न रहि एकपछि अर्को एमालेकै कार्यकर्ताको हत्यामा संलग्न रहेपछि एमालेका अध्यक्षले प्रधानमन्त्री हुनु अघी नै पुनलाई कार्वाही गर्न प्रहरीलाई निर्देशन दिएका थिए।

गुण्डाहरुको बारेमा जानकारी राख्ने र विभिन्न कार्वाहीमा यसअघी सफलता पाइसकेका प्रहरीको टीमलाई सिआइबीले पुनलाई कार्वाही गर्न खटाएको थियो। लामो अनुसन्धान पछि पुन बसेको एरिया रेकी गरि भारतको तटीय राज्य गोवाबाट पुनलाई सहयोगी सहित प्रहरीको टोलीले नियन्त्रणमा लिएको थियो।

भारतबाट नेपाल ल्याएका पुनलाई प्रहरीले कानुनी कार्वाहीको प्रक्रियामा लैजानु भन्दा पनि आदेश भए अनुसार नै दोहोरो भिडन्तमा मृत्यु भएको बताएको छ। प्रहरीले भवानिपुरमा आपराधिक गतिविधि गरिरहेको भन्ने सूचनाका आधारमा पुगेको प्रहरी टोलीमाथि एक्कासी आक्रमण भएपछि जवाफी कार्वाहीमा चलाएको गोली लागेर पुन र उनका सहयोगी आलेको मृत्यु भएको बयान दिएको छ।

पुनको टोलीले प्रहरी टोलीमाथि आक्रमण गरेपछि जवाफी कारवाहीमा गरेको रुपन्देहीका एसपी श्याम ज्ञवालीले बताए । सीआईबीको समन्वयमा पुनलाई इन्काउन्टर गर्न सफल भएको ज्ञवालीले बताएका छन् । विहान करिव ४ बजेतिर प्रहरीको गोली लागेर घाइते भएका पुन र उनका सहयोगी सोम आलेको उपचारका क्रममा लुम्बिनी अञ्चल अस्पतालमा ज्यान गएको प्रहरीले जनाएको छ ।

फागुन ६ गते गोवामा पक्राउ परेको कुरालाई अस्विकार गरेको सिआइवीले समाचार आएपछि कतिपय सञ्चार माध्यमलाई खण्डन गर्न लगाएको थियो। समाचार आएकै कारण पुनको इन्काउण्टर एक दिन ढीलो भएको स्रोत बताउँछ।

गत साता जिल्ला प्रहरी कार्यालय रामेछापका इन्चार्ज डिएसपी कुमोध ढुंगेलको एक्कासि सरुवा भयो। प्रहरी प्रधान कार्यालयले उनलाई जिल्ला प्रहरी कार्यालय रुपन्देहीमा सरुवा गरेको थियो। एउटा मात्र जिल्लाको इन्चार्ज फेरिनुलाई कतिपयले अनौठो रुपमा लिएका थिए।

उक्त सरुवाको रहस्य बुधबार खुलेको छ। बुधबार बिहान ‘मोस्ट वान्टेड’ गुन्डा नाइके मनोज पुन र उनका सहयोगी सोम आले प्रहरी गोलीबाट ढल्नुमा उक्त सरुवाको सम्बन्ध देखिएको छ।

हत्या र असुलीको आतंक मच्चाउदै आएका पुनलाई पक्राउ गर्नकै लागि डिएसपी ढुंगेललाई रुपन्देहीमा सरुवा गरिएको हो। उनकै कमाण्डमा रहेको टिमसँगको मुठभेडमा पुन र आले मारिएका हुन्। स्रोतका अनुसार प्रहरी प्रधान कार्यालयले सोही मिसनका लागि डिएसपी ढुंगेललाई रुपन्देहीमा सरुवा गरेको थियो।

चरी र पुनको इन्काउन्टरमा एउटै टोली
डिएसपी ढुंगेल तिनै प्रहरी अधिकारी हुन्, जो ३ वर्षअघि डन दिनेश अधिकारी चरीको इन्काउन्टरमा आबद्ध थिए। त्यतिबेला उनी महानगरीय अपराध महाशाखामा इन्सपेक्टरका रुपमा कार्यरत थिए।

२०७१ साउन २१ मा भीमढुंगामा अधिकारीको मृत्यु भएको थियो। त्यतिबेला महाशाखाको प्रमुखमा पुष्कर कार्की थिए। संयोगवश उनै कार्कीले मनोज पुन इन्काउन्टरको पनि केन्द्रीय तहबाट समन्वय गरेका थिए।

चरी र पुन दुवैलाई गोली हान्ने प्रहरी अधिकृतसमेत एकै जना भएको प्रहरी स्रोत बताउँछ।