सातवटै प्रदेशमा आज राष्ट्रिय सभा सदस्यका लागि यसरी हुदैछ मनोनयन,२ नम्बर प्रदेशमा उम्मेदवार छान्न कांग्रेसलाई सकस
राष्ट्रिय सभा सदस्य निर्वाचनका लागि सातवटै प्रदेशमा आज उम्मेदवारी दर्ता हुँदै छ।
बिहान १० बजेदेखि दिउसो ४ बेजसम्म मनोनय दर्ता गर्न सकिने निर्वाचन आयोगले जनाएको छ। माघ २४ गते हुने राष्ट्रिय सभा निर्वाचनका लागि गाउँपालिका र नगरपालिकाका प्रमुख, उपप्रमुख र प्रदेशसभा सदस्य गरि जम्मा २०५६ जना मतदाता रहेका छन्।
प्रत्येक प्रदेशबाट ८ सदस्य (महिला ३, दलित १, अपांगता अल्पसंख्यक १, अन्य ३) गरि जम्मा ५६ जना राष्ट्रिय सभा सदस्यका लागि निर्वाचित हुनेछन्।
आयोगले राष्ट्रिय सभा निर्वाचन प्रयोजनका लागि सबै प्रदेशमा निर्वाचन अधिकृतको कार्यालय सञ्चालनमा ल्याइसकेको छ।
प्रदेश १ को विराटनगर, २ को जनकपुर, ३ को पाटन, ४ को पोखरा, ५ को दाङ, ६ को सुर्खेत र प्रदेश ७ को दिपायलमा निर्वाचन अधिकृतको कार्यालय खोलिएको छ। ती कार्यालयमा गएर दलहरुले आफ्नो मनोनय दर्ता गर्ने छन्।
निर्वाचक मण्डलबाट एक प्रस्तावक र एक समर्थक लिएर योग्यता पुगेका जोसुकै व्यक्ति राष्ट्रिय सभा सदस्य उम्मेदवार हुन पाउने कानुनी प्रावधान छ।
आयोगका अनुसार उम्मेदवारले मनोनयनपत्र दर्ता गराउन जाँदा नागरिकताको प्रमाणपत्रको प्रतिलिपि, मतदाता सूचीमा नाम भएको प्रमाण र दलको उम्मेदवार हुन चाहे सम्बन्धित दलको औपचारिक पत्र बोकेर जानुपर्छ। उम्मेदवारी दर्ताका लागि १० हजार रुपैयाँ धरौटी तोकिएको छ।
राष्ट्रियसभा सदस्यका लागि एमाले, माओवादी, राजपा, संघीय फोरमले हिजो नै उम्मेदवारको टुंगो लगाइ सके पनि कांग्रेसले प्रदेश २ का उम्मेदवार अझै टुंग्याउन सकेको छैन्।
प्रधानमन्त्रीनिवास बालुवाटारमा मंगलबार राति अबेर सकिएको कांग्रेस शीर्ष नेताहरूको बैठकले अन्य प्रदेशमा भने उम्मेदवारको टुंगो लगाएको छ।
प्रदेश २ मा भने फोरम–राजपासँग चुनावी तालमेल गर्ने सहमति भए पनि क्लस्टरको टुंगो नलागेकाले उम्मेदवार चयन हुन नसकेको कांग्रेस प्रवक्ता विश्वप्रकाश शर्माले बताए।
