नेपालमा अब ७७ जिल्ला बनाइने,प्रदेश र केन्द्रको निर्वाचन एकै चरणमा गर्न दलहरु सहमत

कानून, न्याय तथा संसदीय मामिलामन्त्री यज्ञबहादुर थापाले प्रदेश र केन्द्रिय संसदको निर्वाचन एकै चरणमा गर्ने तयारी भैरहेको खुलासा गरेका छन् ।
नवनियुक्त मन्त्री थापाले यस्तो खुलासा गरेका हुन् । उनले भने,“सबै दलहरुवीच सहमति हुने अवस्था छ, त्यसैले प्रदेश र केन्द्रिय संसदको निर्वाचन एकै चरणमा गर्नेगरि हामीले तयारी गरिरहेका छौं।”
निर्वाचन क्षेत्र निर्धारण आयोग हालै गठन भएको छ । आयोगले काम गरिरहेको छ । तर मन्त्री थापाले नेपालको जिल्ला अब ७७ पुग्ने दाबी गरेका छन् ।
त्यस्तै उनले निर्वाचनको लागि चाहिने सबै ऐन तथा कानूनहरु अहिले निर्माण भैरहेको समेत जनाए । मन्त्री थापाले निर्वाचन आयोगलाई चाहिने सबै कानुन तथा ऐनहरु समयमै उपलब्ध गराउने समेत प्रतिबद्धता जनाए ।
मन्त्री थापाका अनुसार उनले स्थानीय तहका जनप्रतिनिधिहरुलाई चाहिने सेवा तथा सुविधा सम्बन्धी कानून समेत चाँडै उपलब्ध गराउने र मुलुकी ऐन २०१९ समेत संशोधन गर्ने तयारी अन्तिम चरणमा पुगेको छ ।