हिजो भारतीय दूतावासमा भतेर खाएका राष्ट्रिय जनता पार्टी नेपालका नेताहरुले आज पदाधिकारी बैठक सुरु गरेका छन । राजपाको केन्द्रीय समितिको साउन २१ गतेदेखि सुरु हुने बैठकअघि आजदेखि पदाधिकारी बैठक बसेको हो । यो बैठकले चुनाबमा सहभागी हुने निर्णय गर्ने भएको छ।
राजपा स्रोतका अनुसार राजदूत मंजीवसिंह पुरीले २ असोजको स्थानीय निर्वाचनमा सहभागी भएर जान सुझाब दिएका थिए । मंगलबार बिहान ९ देखि १० बजेसम्म भएको भेटमा महन्थ ठाकुर, राजेन्द्र महतो, शरत्सिंह भण्डारी, महेन्द्र राय यादव र अनिल झा सहभागी थिए । राजकिशोर यादव भने दूतावास गएका थिएनन् ।
राजपाको पदाधिकारी बैठक बस्नुअघि केन्द्रीय कार्यालय औपचारिक रूपमा उद्घाटन गरिएको छ । उद्घाटनमा पनि राजपाका पाँचजना शीर्ष नेता मात्रै सहभागी थिए । राजकिशोर थिएनन् । स्थानीयत तहको निर्वाचनमा सहभागी हुने नहुने भन्नेमा राजपामा दुई मत छ । संविधान संशोधन विधेयक पारित नभए पनि चुनावमा जान सकिने एउटा धार छ भने अर्को धार संशोधन पारित नहुँदासम्म सहभागी नहुने अडानमा छ । शरतसिंह भण्डारी, महेन्द्र राय यादव, अनिलकुमार झा, हृदयेश त्रिपाठी, सर्वेन्द्रनाथ शुक्ल, बृजेशकुमार गुप्तालगायतका नेताहरू चुनावको पक्षमा छन् । तर राजकिशोर यादब भने भित्र भित्रै अर्कै पार्टी गठन गर्ने तयारीमा होमिएका छन। श्रोतका अनुसार यादबले चुनाब अगाडीनै नया पार्टी घोषणा गर्दैछन।
